فتافيييييت كلاااااااااام

kol sna we ento tayeban

2008-09-29T11:11:00.000-07:00

كل سنه ونتو طيبين

ويناعد عليكم العيد بالف خير

وعساكم من عواده بردو

kol sana we ento tayeben

2008-08-28T16:50:00.000-07:00

السلام عليكم ورحمه الله وبركاته

انساتى سيداتى سادتى

ايه اللى انا بقولو ده

لالالالا

تانى انا هاقول على طول

كل سنه وانتو طيبين وكل المسلمين بخير ويعود علينا رمضان ان شاء الله كل سنه بخيره وفضله

وزى مابيقولو هنا فى الامارات عساكم من عواده

و.....اممممممممممممم و.....مش عارفه اقول ايه تانى

حلو ياحلو رمضان كريم ياحلو

ملحوسايه صغنتته::: انا مش هكتب فى المدونه دى لحد مارمضان يخلص خااالص بس هتابع ان شاء الله

تروس مسلوبه الاراده

2008-08-15T16:34:00.000-07:00

زمان لما كنت بسمع كلمه دول العالم التالت

مكنتش بعرف معناها ايه
بس لما دخلت اداب جغرافيا؟

محدش يتريئ على القسم بتاعى)؟)
عرفت معناها وادايقت اوى لما افتكرت ساعتها اننا من الدول دى
وبعد ما الدكتوره فهمتنا معنى الكلمه دى مسمعتش اى حاجه تانيه منها (لا منمتش ولا حاجه)؟

انا كنت بفكر ليه ؟وايه خلانا كده؟؟
وبعدين فكرت حتت فوكيره ان بلدنا عامله زى الساعه بظبط

والناس هيا التروس اللى بتمشى الساعه دى وبتظبطها فلما بيبوظ ترس واحد فى الساعه دى

او يبقى خلاص قرب على الهلاك وبيشتغل غصب عنه الساعه دى يابتقف خالص يااما بتاخر كتير اوى عن اى ساعه تانيه

واحنا بقى تروس بلدنا كلهاااااااا يافيها متعطل خالص ومش شغال يااما اللى شغال فيها شغال غصب عنه ومش بارادته يعنى بمعنى اصح بيبقى ترس مسلوب الاراده بيشتغل غصب عنه عشان يقدر يعيش حتى التروس الكبيره المسؤله عن التروس
الصغيره دى فى تروس اكبر منها بكتيييييييير بتتحكم فيها وبتسلب ارادتها دى ومنقدرش نستنى من حد مسلوبه ارادته ومش عايش بحريه اى تقدم

يعنى طلعت تروس الساعه بتاعتنا كلها بايظه عشان كده احنا ساعه مأخره .......

قررت الصمت

2008-08-11T08:10:00.000-07:00

قررت ان اصمت صمت الراحلين....

لان روحى رحلت برحيله

اتسائل كثيرا:لماذاولماذاولماذا؟؟؟

ودائما ماتكون الاجابه::انه الغدر الذى ملأ العالمين

تحرجت الدموع فى العينى وتحجر معها نبض قلبى

فمجرد البكاء جهرا فيه فضح للأسرار

ولم اتمن يوما ان اكون بهذه القسوه ولكن لم يعد الامر بيدى

فقد امنت بالله وكفرت بالبشر

hiiiii

2008-08-10T20:13:00.000-07:00

haiiiiiiiiiiiiiiiiiiiii 2 all

sorry ana mesh 3arfa atabe3 el blog walahy 3'sb 3any

ed3oly elcomputer rabena yehdah we yekteb 3arabiii

miss u alll

nonaaaaa'''''''''''''''''''''

ااحمدو ربنا

2008-06-25T12:53:00.000-07:00

هاقولكو على شويه عادات فى الجواز بره مصر يعنى ممكن تعرفوا انكم فى نعمه وتحمدو ربنا

لما ينوى الشاب اليمنى انه يتجوزه بيروح هو ومامته بيت البنت ولازم وحتما ولا بد انه ياخد هديه غاليه جداااا معاه(مش دسته جاتو وخلص نفسك)
سواء بقى البنت عجبته او لا او اترفض او اتقبل
ولازم الهديه دى تكون بحوالى 150 دولاراحسبوها انتو بقى
وفى كل موسم دينى لازم يجبلها هديه زيها بظبط فى القيمه ولما بقى الحمد لله كل شئ يتم ويجى وقت عقد القران

لازم الشاب الظريف اللطيف اللى هايتجوز يجيب للعروسه:::ايه بقى ياحلويييييييين؟؟

سلسه ذهب طولها متر وحزام من الذهب واسوره وحلق ده فى كتب الكتاب بس هديه يعنى للعروسه
ولازم الشاب الظريف اللطيف اياه اللى هايتجوز يبعت لعروسته كل يوم مصروفها لحد مايتم الزفاف عليها
وقبل ليله الدخله لازم الشاب اياه برضه يدفع حاجه اسمها الشرط وهو قيمه الدهب ده بس فلوس لبابها ومامتها وقرايبها كلهم يعنى خراب بيوت مستعجل
وفى ليله الدخله بقى لازم يكون فى جيبه15 الف ريال
بتاخدها عروسته
قبل ماتكشف الطرحه من على وشها وبيسمى المبلغ ده حق الدخله(ها 15 الف عشان يشوف وشها واخدين بالكو)؟
وبيستمر حفله الجواز اربع ايام
وطبعا كلو على حساب صاحب المحل اللى هو؟؟ اه صح الشاب اللطيف الظريف اياه

وفى الامارات لازم العريس يجيب للعروسه وام العروسه كل واحده كيلو دهب هديه
ويرمى تحت رجل العروسه دراهم دهب كتييييييييييير
وهيا ماشيه(كتنا نيله فى حظنا الهباب)؟

وفى باكستان بقى ها شبكه العروسه بتبقى عدد كبير جدااا من الاساور الذهبيه
يبدأمن 7 لحد 17 اسوره ولازم يكون عدد فردى مش عارفه ليه محدش يسألنى؟؟؟

ده بس عشان تحمد ربنا يارجاله مصر وتعرفوا ان الجواز عندكو مش مكلف نهائى والبت الغلبانه اللى بتتجوزوها بتساعدكو كمان فى الجهاز ولا جنيهات دهب بتترمى تحت رجلها ولا حزام دهب ولا غيره
ونبى احنا لينا الجنه

غربه

2008-06-21T17:56:00.000-07:00

وانا بتمشى وبلف على البولجات كده من يومين قريت عند محمد شبل

موضوع قديم كان كتبه وعجبنى لانى حسيت انه بجد قال كلام انا نفسى كنت اقوله

*وطن .....يوطن...استوطن*

لان مش سهل على الانسان انه يحس بالوطنيه والانتماء لبلده بجد طول ماهو بعيد عنها ومتربى بره ارضها
بس بجد الغريبه ان فى ناس كتير عايشين على ارض بلدهم ومبعدوش عنها ابدا ومجرد انهم بيدعوا الوطنيه ادام اى حد علشان محدش ينتقدهم مش اكتر

بس بجد اكتشفت ان:::::::::::

ان معظمنا حاسين بغربه لما بيبقوا جوا ارضهم ومش لاقيين وطن لينا يعنى بمعنى اصح

****لكل الناس وطن يعيشون فيه الا نحن لنا وطن يعيش فينا

انا كده

2008-05-19T07:55:00.000-07:00

مش عارفه ليه الناس بتنتقدنى كتير وكل اللى يكلمنى يوقلى انتى طيبه اوى وعلى نياتك ويتخاف عليكى

لييييييييييه ليييييييييييه نفسى افهم

لا خليكى ناصحه كده واعرفى اللى حواليكى بيفكروا ازاى

اولا:::انا مش ساذجه ولا مغفله انا واحده تجاربها بسيطه اوى فى الحياه عشان كده ممكن مفهمش اللى قدامى

او افتكر انه كويس بسرعه واثق فيه ومش معنى انى طيبه وعلى نياتى يبقى ده عيب لا انا مقتنع بنفسى كده وخبرتى مع الناس هاتزيد مع الوقت

منا لازم اغلط علشان اتعلم

ثانيا:::فى ناس بتستغرب اوى انى مرتبطتش قبل كده ولا حبيت ليه يعنى

ويئعدو يقولولى انتى يامعقده يامعنديش احساس يامقبلتش حد كويس

لا لاكده ولاكده ولاكده

انا بحس ان قلبى زى الورقه البيضه واللى هايجى يرتبط بيا ده هايرسم فى الورقه دى ومش عايزه واحد يجى يشغبطلى فى الورقه ويشمى انا عايزاه يرسم فى والرقه دى ارض خضرا ورده وشمس طالعه وسما صافيه وبعد كده يجى اطفال يضحكو ويهيصوا يكملو الرسمه ويخلوها احلى واحلى

لا الورقه اللى بيتشغبط فيها بتترمى ولو قلنا مثلا نمسح الشخبطه دى لا الحب ذى القلم الجاف بيعلم ومش بيروح حتى لو خفيناه بقلم كوركيتر

مكان القلم الكوركيتر بيبقى باين تحت الرسمه الحلوه

وانا مش عايزه حاجه تبوظ رسمتى

ثالثا:::برضه فى ناس بتنتقدنى انى بهزر وبضحك كتير وبأعد اتنطط والعب واهزر وبيقولو عليا مش بتحمل مسئوليه وكل حياتى ضحك وبس

لا انا مجرد واحده مش بتحب النكد مش بحب اشيل فى قلبى هموم انا لسه عندى20 سنه هموم ايه اللى اشيلها دى

وبعدين انا سمعت قبل كده ان اللى بيحب حد ماينفعش يزعله ولا يدايقه وانا بحب نفسى يبقى ادايقها ليه وازعلها ليه

رابعا::: فى ناس بتزعل منى اوى انى مش باعد فى مصر كتير وفى ناس بتكلمنى تقولى ازاى متحبيش تاعدى فى بلدك على مااظن

ان اى حد فيكو لو جتلو فرصه انه يسافر بره هايسافر

تخيلو بقى انى انا اللى متربيه بره اعمل ايه

بس كده خلاص انا حبيت اقول الكلمتين دول علشان الناس تفهمنى كويس ومحدش يقول عليا ساذجه او معقده او مش بتحمل مسئوليه تانى

انا بحب نفسى كده ومقتنعه بيها كده

وعارفه انى كويسه كده

حاله طوارئ

2008-05-02T09:02:00.000-07:00

عندى حاله طوارئ بالمذاكره

امتحناتى قربت ادعولى بقى

ربنا معانا كلنا

نونااااااا

واحنا علب زبادى

2008-04-24T04:32:00.000-07:00

اه علب زبادى

احنا مش كنا بنحب الزبادى

كلنا لما بنأعد نفتكر واحنا صغيرين بنسرح ونضحك ونبتسم ويترتسم علينا ملامح غريبه وجميله طيب ليه بنسرح ليه بنفتكر ايه؟؟؟؟

ياترى بنفتكر االمقالب اللى كنا بنعملها واللعب فى الشارع ونطلع مبهدلين ونستحمى بالعافيه عشان عايزين ننام

والضحكه اللى كانت بتطلع من قلبنا صافيه وجميله تخلى الدنيا كلها تضحك

انا عن نفسى بفتكر اللعب فى الشارع مع اصحابى صبيان وبنات

ولعبه صيديه السمك وتيكا على العالى وتيكا على الواطى وكهربا ياااااااااه حاجات كتير بتخلينا نبتسم بس اللى بيخلينى اضحك من قلبى المقالب اللى كنت بعملها يعنى حاجات كتير وكنت باكل كل علقه وعلقه بس ماكنتش بحرم...

يعنى انا مره كنت متغاظه من بنت خالتى عشان كانت ضوافيرها حلوه وطويله

وانا كنت بقرقض ضوافرى سبتها نامت وانا مسكتهم قصيتهم (وهيا بقى نومها تقيل تقل)محستش ولما قامت الصبح اعدت تعيط وانا اضحك فى خباثه

ولما كنت ببقى عايزه لعبه ولا حاجه اعمل نفسى عيانه ولما كنت ابقى مكسله امشى لما كنا بنبقى رايحين مشوار اعمل نفسى نايمه ولما مره اقنعت اختى انى احطلها مكياج وشغبطلها على وشها بالقلم الحبر

وهيا اعدت تعيط وانا كلت علقه بقى سوقع يعنى بس على مين ابدا دنا توتو(على فكره بيقولولى فى البيت ياتوتو)؟؟

...............هو انا طلع عليا اسم توتو من فراغ(قال ايه بيقولو عليا سوسه حرام عليهم ظالمنى)؟

ولما روحنا السيرك

وخليتهم مش واخدين بالهم ورحت نازله تحت فى عرض الاسود

ورحت مدخله ايدى وراسى بين السلك وانا عامله زى الدوده

دخلت ازاى معرفش وقال ايه بحسس على الاسد (اصله قطه) وهو لسه بيدور راح الراجل خد باله وضرب عليه حقنه التخدير دى وضربه بالكرباج وراح شايلنى وقال بنت مييييييييييين دى لا وماما بتبص مين الل يابه بنتها كده بعده جاتلها حاله اذبهلال لما لاقتنى انا

وانا بقى كان عندى هوايه انى اشترى ضفادع انا واصحابى الصبيان او نروح نصتادها عادى يعنى ونرميها على البنات اللى بيأعدو يصوتو علشان نضحك عليهم ولا كانى منهم عادى جدااااااا دلوقتى بخاف امشى على النجيله يااااااااه قول لزمان ارجع يازمان

ومره بقى وقعت فى بلاعه كبيره وانا بلعب

وواحد من المنطقه شافنى وانا بقع ومد ايده جبنى

يعععععععععععععععععععع وكانت رحتى وحشه اوىىىىىىىىىىىىوعييت وكانت حالتى صعبه

وجالى ايامها التيفويد وكنت هامووووووووت

ومره تهت على البحر وملقتش بابا وماما واعدو يدورو عليا لحد ملاقونى اعده مع ناس غريبه باكل سندوتشات(صحيح انا هاوجع دماغى ليه مهما اكيد هايدورو عليا اعد انا اكل واسند طولى انا تعبانه وبلعب طول النهار)؟

ها اكمل ولا كفايه انا من رايى كفايه عليكو كده

لحسن تقولو عليا متشرده ولا حاجه لاسمح الله

نوناااااااا (توتو سابقاااا)؟

ونبى احب التاج انا

2008-04-20T19:19:00.000-07:00

والله التاج ده حاجه حلوه خالص وخصوصا شكله حلو بفكر انى البس تاج فى فرحى بس لو ربنا هدانى ولبست الحجاب فى الفرح ماينفعش بس معالينا هاحاول اظبط الموضوع ده علشان هالبسه يعنى هالبسه اصله ياجدعان حلو اى والله زى مابقولكو

ايه الكلام ده معلش واحده عندها ننح فى دماغها وعايزه عريس

المهم بقى انى جالى تاج من منمن حبيبى

وانا ايه بقى هاحلو

التاج اهه

اذكر 10 اشياء عن نفسك

اختر 5 اشخاص تهدى لهم التاج

اترك لهم لينك تخبرهم فية بالتاج
لا تهدى التاج لمن اهداك اياه
اترك لصديقك الذى اهداك التاج اخبارية بان التاج نزل و تعالى شوفه

.....

*مش بعرف اتكلم عن نفسى نوهائيا بوتاتا اطلاقا ومطلقا

*بحب ربنا جداااااا وبغيرعلى دينى اوى ورسولى صلى الله عليه وسلم

*انا جبانه اوى وبخاف من الضلمه والنور الجامد

*بحب الامارات اوى وابتديت اخد على مصر وافكر فيها

*بحب منال جدااااااااااااااا ومتعلقه باماما اوى وبعيده عن دادى نوعا ما

*انا بؤ على الفاضى بقول ومش بعمل

*بنسى الزعل بسرعه ومش بحب النكد خااااالص

*مشكلتى الكبرى انى تنكه جداااااااا ومش باخد على اى حد بسرعه بس والله معظم الوقت

بيبقى خوف منهم مش تكبر عليهم

*نفسى يبقى ليا اصحاب كتييييييييييييييييييير

*الحاجه الوحيده اللى قلبى جامد فيها وبقيت متشرده بمعنى الكلمه فيها السواقه

خلصته هييييييييييييييييييييه

انا هامرر التاج ده لتلاته بس كفايه

احمد الصباغ

لعموووووووور(عمرو عبد الصمد)؟

ابص

ريهام محمود

بخاف

2008-04-15T12:16:00.000-07:00

انا بخاف وممكن اوصل لدرجه انى جبانه

واهرب من اى مشكله ومواجههاش

ومش بعرف اخد قرراتى بنفسى ولما باخد قرار مع نفسى فى الاخر بيطلع غلط

ممكن علشان معنديش خبره او تجارب كتير ولا ممكن علشان انا بخاف فابختار اسلم حاجه واللى هيا فى اغلب الاحيان بتبقى غلط

وممكن برضه مش برفض لاى حد اى حاجه علشان بخاف ازعله

وبخاف احب علشان متجرحش واتصدم واتعب

وبخاف اصاحب اى بنت اوى علشان متكلمش عليا وحش ويطلع اختيارى غلط فى الاخر زى ماغلطت قبل كده

وبخاف امشى فى الشارع علشان الناس معرفهاش

ينهار ابيض انا اكتشفت انى زى مابيقولى دى بتخاف من خايلها

انا جد مره اتخضيت من خيالى على حيطه

بس فى حاجه غريبه جدااااا انى عمرى ماخوفت من بكره زى بقيت الناس

ولا خفت من المستقبل ولا شيلت همه

مهما كان بحلوه ومره

بقول انه يبقى زى مايبقى هاستحمله واعيشه ادام انا فى وسط ناس بحبها

ده فى ناس بتقول انها بتخاف تحلم علشان متتعبش بالعكس انا بحلم كتييييييييير ومش بتعب ولا بخاف من انه مايتحققش

مش عارفه انا غلط ولا صح

بحس اوقات كتير انى بيبى صغيره اوى وعايزه حد ياخد باله منى

نفسى اكبر وابقى جريئه واعرف اخد قرارى بنفسى
ومتخضش لما ابص على الحيطه

rise&fall

2008-04-11T14:37:00.001-07:00

sometimes in life you feel the fight is over,

and it seems as though the writings on the wall,

superstar you finally made it,but once your picture becomes tainted,

it's what they call,the rise and fall (x2)

i always said that i was gonna make it,now it's plain for everyone to see,

but this game i'm in don't take no prisoners,just casualties,

i know that everything is gonna change,even the friends i knew before may go,but this dream is the life i've been searching for,started believing that i was the greatest,

my life was never gonna be the same,

cause with the money came a different status,that's when things change,

now i'm too concerned with all the things i own,blinded by all the pretty girls i see

,i'm beginning to lose my integrity

sometimes in life you feel the fight is over,and it seems as though the writings on the wall,superstar you finally made it,but once your picture becomes tainted,it's what they call,the rise and fall

i never used to be a troublemaker,now i don't even wanna please the fans,

no autographs,no interviews,no pictures,endless demands,

give into vices that was clearly wrong,the type that seems to make me feel so right,

but some things you may find can take over your life,

burnt all my bridges now i've run out of places,

and there's nowhere left for me to turn,been caught in comprimising situations,

i should have learnt,from all those times i didn't walk away,

when i knew that it was best to go,is it too late to show you the shape of my heart,

sometimes in life you feel the fight is over,

and it seems as though the writings on the wall,superstar you finally made it,but once your picture becomes tainted

,it's what they call,

the rise and fallnow i know

,i made mistakes,think i don't care,but you don't realise what this means to me

,so let me have,just one more chance,

i'm not the man i used to be,used to beeeeeeeeeee

sometimes in life you feel the fight is over,

and it seems as though the writings on the wall,

superstar you finally made it

,but once your picture becomes tainted,

it's what they call,the rise and fall (x4)

كلام فى الحب

2008-04-01T08:53:00.000-07:00

الكلام.......... هو اقل درجه فى المشاعر وفى التعبير عن حراره الحب

ويعتبر الشئ العادى لان كل الناس يبتكلمو فى الحب وعن الحب واللى معندوش خبره فى الكلام ومش بيعرف يعبر عن احساسه يابيقول كلام سمعه فى اغنيه يا بيقول كلام قراه فى شعر وده برضه زى ماقلت عادى ومعروف

بس فى حاجات فى الحب بتبقى احسن من الكلام مليون مره

لان الكلام بيتحفظ وبيتعاد وكمان مابيلزمش حد بعلاقه او يأكد الحب

لكن فى لحظات فى الحب بتخلى الواحد ملتزم اكتر بيه مثلا نظره من العين فى لحظه صدق حقيقه

بيقف فيها الزمن ساعتها دى لحظه متتعوضش ومش بتتسنى لان محدش يقدر ياخد عين حد يبص او يحس بيها

اوقات كمان بيحس بلحظه حنين ماينفعش يعبر عنها اى كلام فى الدنيا دى وكل اللى بنقدر نعمله ساعتها اننا نحس وبس

وممكن تعدى علينا لحظات اشتياق لحبيبنا مايبقاش قدمنا غير اننا ممكن نتصل بيه نسمع صوته من غير مانتكلم بس يبقى كفايه علينا اننا سمعنا وته وبتعدى علينا لحظات غيره ومابتعبرش عنها غير نظره العين وتعبريات وشنا

لان الكلام فى اللحظات دى غالبا ما بيزعل حد من الطرفين

بس الاحسايس دى كلها بتيجى وبتكبر عن طريق حاجه واحده بس سلوك حبيبك اللى قدامك معاك

هو اللى يقدر يخليك تحس بكده او تحس ببرود وفتور نحيته

وبما انى سه جديده فى الموضوع ده كل اللى اعرفه انى مزعلش حبيبى واعمل اى حاجه هو عايزها لانه بيبقى شايف الموضوع من نظره تانيه غير نظرتى ليه واكيد هايبقى خايف عليا ومش عايز يئذينى

لو مش عايزنى اكلم حد معين بيبقى ياهو شايف فيه حاجه يااما هو غيران عليا ومش عايزنى اكلم حد غيره وده من حقه زى مهوا من حقى انى اعمل كده معاه لاننا ساعتها مش بنبقى عايزين غير بعض وبس

ونهتم ببعض ونحب بعض ونراعى ربنا فى علاقتنا واستحمله ويستحملنى

بس فى ناس بتموت الاحساس ده بسلوكها وطريقتها ونظرتها وكل حاجه فيها وبتعملها

وبما انى بقى بجد معرفش ازاى حد يموت احساسه بحد فاسئلت ناس اصحابى

سئلت اوشى اول واحده وقالتلى.::::يابنتى حب ايه انتى بتتكلمى فى ايه دلوقتىالكلام بقى عباره عن اغانى بيرددوها وبس والشباب دلوقتى بقوا يحبو علشان مصلحتهم يعنى عايزين فلوس عايزين يروشو فى وسط اصحابهم اهى معاهم بنت اموره يتمنظر بيها

واول ما البنت تقولو انا اهلى مستنينك فى لحظه يختفى ومتلاقيهوش واكتر حاجه بتدايقها فى الشباب نظرتهم اللى مافيهاش لاغيره ولاخوف

والكلام سهل عندهم اوى ومافيهوش التزام

(انا قلتلها انتى اللى بتختارى غلط اكيد)

جىجى بقى دخلت فى وسط الكلام وقالتلى نهى انتى عبيطه يابت ولا ايه انا هاتجوز واحد كويس ابن حلال وخلاص قال حب قال انا مش ناقصه واحد يجى يوجعلى دماغى بكلام فارغ انا عايزه بيت واستقرار واطفال والحب بيجى بالعشره

قلتلها والله ده رايك

نانى بقى قالتلى كلام اوشى صح كل الصبيان بقوا عندهم جراءه رهيبه فى الكلام ومافيش خوف على البنت اللى معاهم ولا بيراعو ربنا فيها ولا اى حاجه واهم بيتمنظرو وخلاص دول فاكرين نفسهم عايشين فى اروبا يمشوا مع البنت شويه ويسيبوها وكان البنت دى لو اتعرف عنها انها مشيت ولا عرفت ولا حبت حد ده مش هايضرها

والبنت اوقات كتير بتبقى داخله بكل مشاعرها فاكره الولد كويس وهايجى يخطبها وهو ولا فى دماغه

جت بقى الدكتوره الكبيره بتاعتنا شيماء تقول مش المشكله فى الخطوبه دلوقتى فى شباب كتير اوى بتخطب البنات لما بيلاقوهم ملتزمين علشان بس يمشوا وياعدو معاهم وايه هخايكلفهم غير دبلتين وبعد كده خلاص زى ماحصل معايا بظبط كان جاى يهلس الواد وراحت معيطه

قلت فى عقل بالى وصله النكد فتحت

وقلتلهم بصوا انتو اللى بتختارو غلط من الاول

راح رفعت رادد وقالى صح يابت يانهى البنات هما دلوقتى اللى بقوا عايزين يمشوا رايهم وعايزين يعيشوا عييشه تانيه زى اللى بيشفوها فى التلفزيون ومافيش بنت بتقدر ظروف ولد علشان كده اكتر العلاقات بتفشل مابتبقاش غلطت الولد لا البنت بتاخد الولد زى خيل الحكومه تفضل معاه لحد ماتزهق منه وتلاقيه ممنوش فايده ومش قادر على طلبتها وتروح مموتها بس مش بالرصاص لا دى بتموته من الحسره والزعل على نفسه

ومحمد جه وصدق على كلام رفعت وقال ايوه بظبط منا اهه علشان معايا فلوس وعربيه وغيره كل البنات كويسين معايا وانا ولامنظر ولا حاجه

بس هيا كل الحكايه ان كل بنت بتشوف فيا العريس المنتظر اللى هايطلعها من اللى هيا فيه ويعشها عيشه تانيه خالص

انا ساعتها مبقتش عارف ارد لان كل واحد فيهم مجرب وعارف هو شاف ايه

وراحت منال جت فى الاخر قالتلنا قومو يلا بلا حب بلا كلام فارغ عايزين ناكل

بس معقوله فى ناس بتتعامل مع بعض كده سلكوهم وتفكيرهم كده

اللى يحب حد لازم يقدر ظروفه ويستحملهاويهتم بيه الانه مش بيبقى ليهم غير بعض

لازم يحبو بعض لان الاهتمام والتقدير هما اهم حاجه فى الحب ده من وجهه نظرى

سورى يامصر مش حساكى

2008-03-25T22:23:00.000-07:00

بجد مش حاسه بيكى ولا بيهمنى اللى بيحصل فيكى

لا ياجماعه انا مش بكرهها بالعكس اناعادى وانا مش جنسيتى حاجه تانيه لا انا مصريه

ابويا من روض الفرج وامى من القليوبيه

بس عمرى ماعشت فيها محستش بيها مابفهمش حاجه فيها

مش عارفه عيبى ولا عيب مين؟؟؟؟؟:::::::::

انا افتكر انى كنت فى اولى ابتدائى بره مصر ومكنتش بنزل مصر غير كل فين وفين فى الاجازات شهر وارجع تانى

فاطبيعى انى ماشوفش اى حاجه وحشه فيها لانها كانت بتبقى كلها ترفيه

ولما نزلت ادرس فى مصر بعد كده برضه ماحستش بيها لانى يادوبك بأعد فى مصر كام شهرالدراسه وبعدين اسافر تانى

وحتى فى الكام شهر اللى بأعدهم هنا فى مصر مش حاسه بحاجه بروح احسن اماكن اتفسح فيها العربيه تحت امرى مش بتبهدل

افتكر انى كنت واقفه مره فى الشارع جنب ماما بنشترى حاجات لقيت اتنين ستات بيتكلمو مع بعض وواحده بتقول للتانيه كيلو البصل بقى بخمسه جنيه وازازه الزيت بقت بعشره جنيه

والله انا مفهمتش ساعتها هيا بتقول كده فرحانه ولا زعلانه معرفتش ان دى حاجه غاليه عليهم لما سألت ماما قالتلى لا طبعااااا غالى جدااااااا ربنا يكون فى عونهم ويرزقهم برزق عيالهم

بس بجد استغربت اوى اوى خمسه جنيه كتير اوى للدرجه دى خمسه جنيه مش عارفه ليه محستش انها غاليه وحسيت انى غريبه اووووووووووى عن البلد دى معقوله معقوله مش عارفه اى حاجه كده

طيب انا متكلمتش هنا عن ازمه العيش مش عشان مثلا انا لقيت ناس كتير بيتكلمو عنها لا علشان انا اصلا مكنتش حاسه بيها نهائى

انا لما ببعت البواب يجيب عيش بيروح يجبلى بسرعه ومش بيتأخر وكنت بستغرب اوى ازمه ايه اللى بيتكلمو عنها مهو الراجل بيروح يجبلى بسرعه اهه

سئلت ماما برضه قالتلى العيش بتاع الفرن غير اللى احنا بنجيبه اللى عليه الازمه العيش المدعم قلت يااااااااااااااه انا غبيه للدرجه دى معقوله مكنتش حاسه بكده

حسيت انى عايشه انا واصحابى فى عالم تانى مع نفسنا مش عارفين ايه اللى بيحصل حوالينا انا بجد مابتديتش اخد بالى من مصر الا لما دخلت عالم التدوين ابتديت افتح عينى على اللى بيحصل

لدرجه انى مش فاكره انا كنت قبل كده عامله ازاى فعلاقتى ببلدى

بس للاسف عندى برود من ناحيتها مش قادره احس بيها لحد دلوقتى بخاف من شوارعها بخاف من ناسها وبالذات بعد اللى عرفته والمشاكل اللى بتحصل فيها

بتجيلى اوقات كتير بهرب منها وبسيبها وبنزل بس على امتحاناتى علشان مش قادره اعد فيها مابصدق بابا يقولى تعالى اعدى معايا بوافق من غير تردد

لانى بمعنى بسيط مش بحس بالاستقرار هنا خالص مش حاسه ان ده بيتى وان دى اوضتى وان ده الشارع اللى انا ساكنه فيه وان دى منطقتى لا بحس ان مجرد حاله مؤقته لسبب الدراسه وبس

نفسى احبها اوى نفسى احس بيها وابقى زى ناس كتير بحبها وبحس بيها وبخاف عليها واحس انى منها

حاسه دلوقتى انى تايهه

معايا الجنسيه المصريه ومش منتميه لبلدى ولا حاسه بيها

ومنتميه للامارات وحاسه بيها ومش معايا جنسيتها

طيب انا منين بقى طول عمرى اعرف ان الوطن هو اللى الانسان بينتمى ليه وبيحس بالاستقرار فيه

طيب وبعدين انا كده ماليش وطن ماليش مكان

بجد بجد الموضوع ده تعبنى جداااااااااااا ومش عارفه اعمل ايه مش عارفه غلطت مين؟؟

انا دلوقتى هسافر تانى احتمال اجى واحتمال مرجعش تانى

بس نفسى اجى لوحدى اجى وانا عايزه كده مش علشان حاجه

علشان وحشتنى علشان حبتها علشان خوفت عليها ومقدرتش على بعدهااا

بس لحد دلوقتى انا اسفه يامصر بجد مش حساكى

تاااااااانى تاج

2008-03-25T11:09:00.000-07:00

التاج ده جالى من منى حبيبتى من مدونه

http://meyasaaa.blogspot.com/

عارفين لما جيت اجاوب التاج ده اكتشفت انى مكنتش عارفه الرسول(صلى الله عليه وسلم) كويس

مردتش اجاوبه غير لما اكون اد انى اتكلم عنه واد انى اجيب سيرته مكنش بكتب الكلام اللى بسمعه وخلاص

والحمد لله انا دلوقتى احسن من الاول بكتير وبشكر منى وبقولها جزاكى الله كل خير يامنى انك بعتلى التاج ده

ابتدى اجاوب بقى

لو سألك غير مسلم عن نبي الإسلام بماذا ستجيبه في سطور ؟

انا هاقولو الكلام اللى انا قريته فى كتاب اظهار الحق:::

سيدنا محمد صلى الله عليه وسلم

كان :اسبان هميس المسيحى من الذين هم اشد اعداء النبى صلى الله عليه وسلم

والطاعنين فى حقه

ولكنه اضطر قى الاقرار بوجود اكثر الامور المذكوره فى ذاته صلى الله عليه سلم وكما نقل (سيل )قوله فى مقدمه ترجمه القرآن فى الصفحه السادسه من النسخه المطبوعه سنه 1850

هكذا:::(انه كان حسن الوجه وزكيا وكانت طريقته مرضيه وكان الاحسان الى المساكين

شيمته وكان يعامل بالخلق الحسن وكان شجاعا على الاعداء وكان يعظم اسم الله تعظيما

عظيما وكان يشدد على المفترين والذين يرمون البرآء ةالزانين والقاتلين واهل الفضول

والطامعين وشهود الزور تشديدا بليغا وكانت كثره وعظه فى الصبر والجود والرحمه والبر

والاحسان وتعظيم الابوين والكبار وتوقيرهم وتكريمهم وكان عابدا مرتاضا فى الغايه)؟

لو اتيحت لك الفرصة لرؤية النبي صلي الله عليه وسلم في أي مكان تريد أن تقابله ؟

فى اى مكان طاهر

مالذي ستخبره به ؟

هاقولو انى كنت مشتاقه لرؤيته

وماذا ستطلب منه ؟

انه يشفعلى

اذكر مقولة قالها النبي صلي الله عليه وسلم لصحابي تمنيت لو كان قالها لك ؟

انا مافيش موقف اتذكره مع الصحابه دلوقتى بس فى موقف مع السيده عائشه حلو اوى قريته وبجد ده عجبنى جحداااااا

هي عائشة بكل الحب الذي أعطاها إياه ، حتى الغيرة التي تنتابها عليه ، على حبيبها عليه الصلاة والسلام ، غارت يوما من جارية طرقت الباب وقدمت لها طبق وفي البيت زوار لرسول الله من صحابته ، فقال للجارية ممن هذه ، قالت : من ام سلمة ، فأخذت الطبق ورمته على الأرض ، فابتسم رسول الله صلى الله عليه وآله وسلم وقال لصحابته ، غارت أمكم ! ويأمرها بإعطاء الجارية طبقا بدل الذي كسرته. أحب فيها كل شيء حتى غيرتها لمس فيها حبا عميقا له ، وكيف لا تحب رجلا كمثل محمد عليه الصلاة والسلام.

اذكر أحب حديث لرسول الله صلي الله عليه وسلم على قلبك ؟

عن أبي هريرة أن رسول الله صلى الله عليه وسلم قال أتدرون ما المفلس قالوا المفلس فينا من لا درهم له ولا متاع فقال إن المفلس من أمتي يأتي يوم القيامة بصلاة وصيام وزكاة ويأتي قد شتم هذا وقذف هذا وأكل مال هذا وسفك دم هذا وضرب هذا فيعطى هذا من حسناته وهذا من حسناته فإن فنيت حسناته قبل أن يقضى ما عليه أخذ من خطاياهم فطرحت عليه ثم طرح في النار ". صدق رسول الله صلى الله عليه وسلم

كيف تعرفت على سيرة الرسول صلي الله عليه سلم ؟ "ما هو المصدر"؟

من مصادرمش كتير من موقع رسوالله وطريق الاسلام

وكتاب اظهار الحق

تأليف الشيخ رحمه الله بن خليل الرحمن الكيروانى العثمانى الهندى

وفى الكتاب ده قريت اثبات نبوه محمد صلى الله عليه وسلم

وطبعاااااااا قصص الانبياء

اذكر صفة تدل على عظيم خلقه صلي الله عليه وسلم والاستدال عليها بموقف ما ؟

الامانه

وكان صلّى الله عليه وسلّم من أورع الناس؛ ولهذا قال: ”إني لأنقلب إلى أهلي فأجد التمرة ساقطة على فراشي أو في بيتي فأرفعها لآكلها ثم أخشى أن تكون من الصدقة فألقيها“. وأخذ الحسن بن علي تمرة من تمر الصدقة فجعلها في فيه فقال رسول الله صلّى الله عليه وسلّم: ”ِكَخْ ِكَخْ ارمِ بها أما علمت أنَّا لا نأكل الصدقة"؟

هل هناك تأثير لرسول الله صلي الله عليه وسلم على "شخصيتك أو حياتك أو بيتك "إذا كانت الإجابة نعم فاذكر مثالاً واحداً لكل منهم ؟

دلوقتى الحمد لله سيره الرسول اثرت عليا جامد اوى فى كل حياتى

بحاول اتشبه بصفاته واعمل بيها على قد مااقدر

امرر التاج لمين؟

لاى حد عايز ياخده

جزر جزر جزر

2008-03-15T07:36:00.000-07:00

انا بحب الجزر ومش حب عادى كنا قلنا ماشى ده حب لدرجه الادمان يعنى انا هاحكيلكو ازاى

انا اول ماقوم من النوم الصبح لازم اشرب كوبايه عصير جزر يعنى بدل كوبايه عصير البرتقال او الشاى بلبن

وبعدين على الغدا بقى ايه لازم اكل بعديه جزر علشان قال يعنى تحليه

وبليل بقى وانا اعده ادام التلفزيون ايه اللى بيحصل انى بدل اللب والسودانى والحاجات دى اقطع حبه جزر واكلهوم لما عرفت فى جزر احمر مترحتش الا لما جيته ودقته بس البرتقالى مافيش زيه لايعلى عليه

وبعدين ادخل انام احلم بقى ان فى جزرايه صغيره طايره فى السما وبتضحكلى وانا بجرى وراها علشان اكلها

ولما بقى بتجيلى كوابيس بحلم ان الجزرايه وحش وبيجرى ورايا وانا بقولا يامااااااااااااااااااااااااااااامى الحقينى

اوقات لما ابقى اعده فى روقان كده وباكل الجزرايه اللى فى ايدى وبسمع عبد الحليم واتخيل يوم فرحى هاعمل ايه اعد افكر انى عايزه اتجوز واحد لابس جزر وانا هاعمل فستانى على شكل جزرايه والتورته هاتبقى تورته جزر ولما نتجوز نجيب اطفال على شكل جزر صغنن ونبقى مستر &مسز جزر

انا لما باعد اتفرج على نشره الاخبار والحاله السياسيه تشعشع عندى وافكر فى القوانين بقى والحاجات دى بتجيى فى دماغى على طول اشرع قانون جزرايه لكل مواطن واعمل على نشر الوعى الفكرى لفوئد الجزر واهميته

ودلوقتى هاوريكو الشنطه والكوتشى بتاعى اللى نفسى فيهم

اوقات بحس ان الجزر اتخنق منى وهاينتحر من كتير منا باكله

شفتو بقى انا بحب الجزر اد ايه يااااااااااااااه جزر حبيبى

2008-02-23T14:10:00.000-08:00

التاج ده اول تاج يجيلى فى حياتى كلها
وجالى من خالو حبيبو احمد فنا هاجاوب بس على ادى بقى

هل توافق على حزف خانة الديانة من البطاقة الشخصية ؟

لا طبعااااا موافقش نحذفها ليه
ما رأيك فى المثليين ؟
قرف جداااااااااااااا
هل هى حرية شخصية ؟
حريه شخصيه لا طبعا اى حاجه حرام مايبقاش فيها حريه شخصيه
هل توافق على الإعتراف بالمثليين ؟
الاعتراف بيهم على انهم يبقو موجودين فى حياتنا وامر واقع لازم نتقبله لا طبعا معترفش بيهم
الاعتراف بيهم بقى على انهم موجودين وهما مشكله لازم نحلها ونقضى عليها اه اعترف انهم موجودين بينا
هل لديك أصدقاء من المثليين ؟
لا الحمد لله مليش حد منهم انا اصلا اقرف منهم مووووت
هل تعتقد بوجود إضطهاد للمسيحين فى مصر ؟
لا منظنش بانهم مضطهدين نهائى بالعكس اظن انهم واخدين حقهم جداااا انا عمرى ماشفت حد مسيحى تعبان او قرفان او مش عايش عيشه كويسه بالعكس بحس انهم واخدين حقهم اوى

من هو الشخص الذى تختارة لرئاسة مصر ؟

انا طبعا ايه رايك والله ابقى جامده وهادلع الشعب

أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟
هاحط كل اللى واحد بيفهم وعارف هو بيعمل ايه فى ماكنه يعنى مثال بسيط هاحط بابا وزير الاسكان والتعمير عشان هو مهندس

هل توافق على مشاركة كل من : الإخوان المسلمين - الأقباط فى الحكم ؟
اه عادى بس مش كتير يعنى
فى رأيك الشخصى .. ما هى أفضل مدونة على بلوجر قمت بزيارتها ؟
كل المدونات اللى بزورها على طول وبرد فيها بحبها وبعتبرها احسن مدونات
للذكور فقط : أيهما تفضل كزوجة .. إمراءه عاملة ، أم ربة منزل ؟

هيا للذكور فقط بس انا هاجاوب غتاته وخلاص انا افضل ربه المنزل معندناش ستات تشتغل بصراحه انا مابحبش شغل الستات بحس انه ملوش لازم او بحس ان المفروض الست تأعد فى بتها كده معززه مكرمه مش تبهدل نفسها

للإناث فقط : هل توافقين على الزواج من رجل مطلق ؟
اه عادى بس مايكنش فارق السن كبير ومايكنش عنده اولاد
اذا تزوجت وأنجبت ولدين وبنتين .. أى الأسماء تحب أن تسمى ؟
احب اسمى يوسف وآسر والبنات رودينا وجنى

هل تعتقد أن توريث الحكم فى مصر . . سيتم فعلا أم لا ؟
معرفش بصراحه بس محبش انه يتم

فى رأيك الشخصى : ماهو أفضل إنجاز لحكومة مبارك ؟
مظنش انها عملت حاجه عدله
وما هو أسوأ عمل قامت به ؟
كل حاجه عملتها وحشه

انا جييييييييييييييييييييييييييت

2008-02-20T10:25:00.000-08:00

انا جيت مصر خلاص رجعت ونورت البلد
بصراحه انا اجيه بقالى حوالى اسبوعين بس النت كان فاصل عندى والحمد لله جه اخيراااااااااااااا بجد وحشتونى جداااااااااااااا

انا مسافره بعيييييد

2008-01-23T03:20:00.000-08:00

ياجماعه انا مسافره الامارات وهاعد هناك شويه كده واجى تانى

بجد انا البلد دى بمووووووت فيها اتربيت عمرى كله فيها حافظه شوارعها حته حته

الناس هناك عارفانى وانا عارفهم

لما بروح هناك وانام على سريرى بحس انى جيت بيتى وانام مرتاحه جداااااا
برغم انى بحب مصر برضه بس هناك ليه تأثير تانى على حياتى ممكن عشان قضت فيها طفولتى كلها ولحد دلوقتى هناك ومابنزلش مصر الا عشان الدراسه بس مش عارفه المهم انا جبت شويه صور للاماكن اللى جنب بيتنا هناك

......,,,,,,,,,,,,,,,,

دى بقى قناه القصباء بتوصل بين البحيره والخليج قال يعنى زى قناه السويس كده

ده بقى السوق المركزى يعنى لما ماما تحب تفترى على بابا شويتين وتسترى دهب وهو مايكونش عايز يوديها سوق الدهب(بيبقى مكسل يسوق)؟

بيوديها تشترى منه اهه جنب البيت

بس انا بقى موتى وسمى انى اروحه بكرهه جدااااا مش عارفه ليه

دى بقى بحيره خالدزى الكورنيش كده عندنا مع بعض التعديلاااات

محدش يسألنى مين خالد ده؟؟؟

دى بقى اسمها خورفكان منطقه بعيده عننا جداااا بس زى منتو شايفين تحفه اصلا يعنى بناخد حبه سياحه هناك

بس من جوه الجبل اللى انتى شايفنه ده حاجه تانيه خالص بس مش لاقيه صوره ليه لو رحناها المره دى هابقى اصورهاليكو

البحر بتاعنا مش بتاعى دادى ومامى لا بتاع الشارقه مش بنشوفو الا فى الشتا بس

ويعنى انتو هنا بتبقو بتصيفوا واحنا بنسيح هناك يابختكو بأقر عليكو

انا بقى ساكنه فى المنطقه دى الانستين دول مديين ضهرهم لبيتى (اتعدلى يابت انتى وهيا)؟؟

شايفين الهنود كتير ازاى هناك مابحبهومش خاااالص ببقى هاموت لو واحد عدى من جنبى

ايه ده ايه اللى جايبك فى نص البوست ياخالو احمد لو سمحت عن اذنك عشان عايزه اكمل الصور
بقولك ايه صحيح وصيتك المدونه وانا مسافره خلى بالك منها

والنعمه هاتوحشنى

ده جامع الملك فيصل جنب بيت البت منال جيالك يابت اهه وحشتينى وبرضه بنروح الجيم اللى جانبوا(اصل النشاط واخدنا)؟

اانا بقى ساكنه فى شارع العروبه ومنال فى شارع الملك فيصل مش بعيد اوى عن بعضينا

ياجماعه اى حد عايز اى حاجه من هناك يوقل ماتتكسفوش انا برضه زى ماما؟؟؟ ماشى بااااااااى

انا هاقوم بقى عشان انا تعبت من الاعده بصراحه ورجلى وجعتنى الواحد حاسس انه متجبس فى الجبس ده

شاممكن يعنى المهم بقى يلا باى زى ماقلتلكو

crime

2008-01-21T07:21:00.000-08:00

I AM SORRY

I KHNOW THAT I KILLED U........

I KHNOW THATS MY FAULT.......

BUT I SWEAR I DID'NT MAKE THAT ON PURPOSE............

WHEN I SAIED NO TO U THATS BECAUSE AM SCARE ABOUT U

BELIEVE ME (I 'LL ALWAYS REMEMBER U)???

FOR GIVE ME>>><<<<

TO MY FRIEND THAT I KILLD HER OF ONE'S OWN FREE WILL

كسر رجل تانى

2008-01-15T08:39:00.000-08:00

انا مش عارفه فى ايه كل سنه لازم تحصلى حاجه

ممكن يكون عليا ندر ولا حاجه اروح افرق نابت يعنى ولا اجيب دستين شمع ولا ايه بظبط

المهم ان السنه دى حصلى ايه بقى زى السنه اللى فاتت رجلى اتكسرت معت اختلاف الاسباب طبعا

مش عارفه فى ناس بتقولى علشان انتى مش بتتهدى مكانك رجلك اتكسرت وفى ناس بتقولى انتى محسوده وفى ناس بتقولى عليكى ندر

المهم انا هاحكى اللى حصلى وخلاص

السنه اللى فاتت؟؟؟؟

اللى حصل انى اخر يوم امتحانات كان صعب مووووت ولجنه مقرفه مووووووت والدنيا حر موووووووووت

خلصنا امتحان وكنا متفقين انا واصحابى ندخل السينما ونتغدى ونخرج كالعاده

اللى حصل انى رحت ستى ستارز ولما ركنا العربيه ونزلت لقيت عيل صغير وشو مش باين من قفاه رشق فيا وبعدين شغل الاسطوانه ونبى ياهانم اى حاجه ونبى انا جعان ومكلتش من ساعه ماتولدت ونبى ياست اللهى ينجحك اللهى يسترك

المهم ادتيله اللى فيه النصيب ودخلنا المول ودخلت السينما ونمت فيها كالعاده برضه وخرجنا اتغدينا وايه بقى تمام التمام المهم وانا خارجه

مروحه البيت لقيت نفس الواد رشق فيا قلتله انت ياض انا مش اديتك تاكل مكلتش ليه

وديت الفلوس فين؟؟؟ قالى انا كلت بس مشبعتش قلتله مليش فيه امشى ياض مش زنبى ان بطنك كبيره ومابتشعش ورحت مدوره وشى وانا عامله فيها شريره وبفتح باب العربيه عشان اركب لاقيت الواد ادانى حتت ضربه انا الاول تنحت

بس على مين بقى الواد جرى وانا مسبش حقى نهائى وجريت وراه وحلفت ميت عظيم انى هاضربه بالشلوت المهم وانا بجرى وراه لحقته واجى اديله الشلوت اروح هوووب متزحلقه ووقاعه على رجلى وايدى وجالى شرخ فى ايدى وكسر فى رجلى اه يانا يابابى..

والواد اعدت يضحك عليا اصلى وقعت ولا اجدعها جردل؟؟؟

المهم اصحابى ضحكوا عليا برضه بس هما استغربوا لما مقمتش تانى اصلهم عارفنى لما بقع ومش بيحصلى حاجه بيقوم وبجرى تانى يقاتل يامقتول

جم لحقونى وودونى على المستشفى اتجبست وروحونى البيت واول ما ماما شافتنى راحت راقعه بميه خمسه وتلاتين صوت

وقالتلى؟؟ ايه يابنتى ايه اللى حصل؟؟

وانا كل اللى جه عليا اعت اعيط واقولها مضربتش الواد ياماما مضربتوش وقضيت الاجازه مكسره

السنه دى بقى الحكايه الحمد لله مكنش فيها فضيحه فى الشارع

انا كنت فى منتهى البراءه بلعب مع ابن خالى وبنت خالى وبتنطط معاهم على السرير (اشمعنى هما يعنى هما احسن منى فى ايه)؟؟

ولقتنى مره واحده بطير فى الجو ونازله على رجلى والحمد لله رجلى اتكسرت لتانى مره ورحت فاتحه فى العياط زى الاطفال باعلى صوتى واتهزئت من ماما وخالى (عشان هما شريرين)؟؟

واتجبست وهاقضى نص السنه متجبسه

احنا الستات فلتناااا

2008-01-08T09:07:00.000-08:00

الحقنى الحقنى يابن الجنى

مش انا اللى بقول كده ياعم انت وهو ده عم محمد صبحى فى مسرحيه تخاريف

طبعا طبعا طبعا كلنا اتفرجنا عليها انا بموت فى المسرحيه دى

واكتر حته بحبها اوى فيها لما يكون فى امنيه السلطه ويحكم الشعب ويتكلم فى التلفزيون ويقولهم (وله ياشعبى)؟

المهم وانا اعده بتفرج من كام يوم على روتانا (اه عندى دش)على المسرحيه اعدت اتخيل لو الجنى ده طلعلى

انا اول حاجه هعملها هايغمى عليا لان شكله وحش جدا فى المسرحيه

بس تخيلت هاطلب ايه منه لو انا فى المسرحيه دى هاتمنى ابقى مكان انهى واحد فيهم

اللى عايز

فلوس

ولا القوه

ولا السلطه

ولا الشعاااااااااااااااااع اصدى الوسامه والجاذبيه

ولا الشخصيه القويه ويبقى نصى راجل ونصى ست

ولقيت انى هاطلب منه

الشخصيه القويه بس بلاش حكايه نصى راجل ونصى ست دى صعبه شويه

وانتو بقى هاتطلبو انهى امنيه فيهم ؟؟؟؟؟؟؟؟؟

ده كان موضوع كتبته زمان فى منتدى كنت بحبه برضه زمان وكنت بكتب فيه

المهم قلت اجيبه هنا بس حبيت اغير حاجه فيه انى مبقتش عايزه الشخصيه القويه لانى قويت شخصيتى(لا مخلتهاش تشيل حديد يالذيذ انت وهو)؟؟

انا زادت ثقتى فى نفسى وشخصيتى الحمد لله كتير اوى عن الاول بس مش الجنى اللى عمل كده فيا لا انا اللى عملت كده

لو جالى بقى الجنى دلوقتى انا هاطلب منه الشعاااااااااااااااع اصلى زهقت بقى وعايزه اتجوز والواحد محتاج لتغيير برضه

محدش عنده عريس؟؟ بدل مانحتاج للجنى ونتعب الاخ معانا؟؟؟

واى حد يقرا الموضوع ده عايزه اعرف منه هو نفسه يبقى ايه وليييييه(غتاته بقى)؟؟؟؟؟

happy new year

2007-12-31T05:56:00.000-08:00

عيدكم مبارك

2007-12-18T04:24:00.000-08:00

كل سنه واتنو طيبين ان شاء الله
والامه الاسلاميه بخير

عساكم من عواده

نفسك فى ايه قبل ماتموت

2007-12-11T07:20:00.000-08:00

ايه العنوان اللى يخض ده

لا مافيش حد هايتعدم ولا حاجه انا قصدى بس نفسك تعمل ايه فى حياتك او تحقق ايه قبل ماتموت

يعنى فى ناس بتبقى نفسها فى حاجات كتيييييييييير اوى تعملها فى حياتها حتى لو كانت حاجات صغيره وتافهه اوقات ,بس بتبقى بلنسبه

ليها حاجه تفرحها واهى اسمها عملت حاجه من نفسها

وفى ناس بتعيش وتموت تبقى نفسها تعمل حاجات كتير اوى ومش بتحقق حاجه منهم مش شرط انها مثلا ماتكنش ناجحه فى حايتها العمليه والاجتماعيه لا ممكن تكون ناجحه جدااا بس مش زى ماهيا عايزه او كانت بتحلم او تكون حياتها خدت مسار تانى غير اللى كانت بتخططله بس زى ماتقولو حصل من غير ماتحس

اتفرجت على برنامج امبارح مش عارفه اسمه ايه بصراحه بس هو اجنبى يعنى بيقولو ايه ان كل واحد فى الحياه لازم يعمل قايمه لنفسه يكتب فيها كل اللى هو عايزه سواء كان مهم او لا ويخلى القايمه ادام عينه طول حياته لان الانسان طول ما احلامه بتبقى موجوده ادامه باستمرار وفى حاجه بتفكره فيها بيحاول على اد مايقدر يحقق الاحلام دى لان القايمه دى زى ماتقولو كده بتستفز مشاعره وتخليه يحن او يفكر اكتر ازاى يحقق احلامه وامنياته دى

مش لازم طبعا تكون الامنيات دى عمليه اوى ممكن تكون ترفيهيه برضه وممكن تكون اى حاجه فى حايتنا

يعنى انا اول ماشفت البرنامج ده قمت جبت ورقه وقلم اوعدت اكتب كل حاجه انا نفسى اعملها ونفسى احققها

لاقتنى عايزه اعمل حاجات كتير اوى ولاقيت الدنيا مره واحده احلوت فى عنيا ولاقيت فيها حاجات كتير حلوه انا مكنتش واخده بالى منها حسيت انى عايزه استفيد من كل حاجه حوليا حبيت الموسيقى اللى بسمعها حبيت لون السما حبيت كل حاجه

ولاقتنى عماله ابص حواليا وادور نفسى اعمل ايه فى حياتى نفسى قبل مااموت اكون راضيه عن نفسى وراضيه عن حياتى اللى انا عشتها ولا لا

عملت كل حاجه فى نفسى ولا لا

لاقتنى كتبت قايمه كبيره اوى اوى اوى اوى فوق ماتتخيلو

اه طبعا مش هاقدر اكتب كل اللى فى القايمه دى هنا

بس انا اكتشفت انى معملتش حاجه نفسى فيها معملتش حاجه بجد تفرحنى

لقتنى مقصره فى حق ربنا عليا لقتنى مقصره فى حق نفسى ومذاكرتى لاقتنى كنت من غير احلام كبيره لاقتنى حتى مكنش عندى احلام بسيطه

لاقتنى نفسى اطير طياره ورق بجد نفسى اطيرها عمرى ماعملتها

بس هاعملها

دكتور الحقنى الحقنى ياخويا الحقنى

2007-11-20T00:50:00.000-08:00

طبعا سمعنا كتيييييييييير عن اخطاء الاطباء س بجد الحكايه زادت اوى يعنى انا مابمسكش اى جرنال دلوقتى الا لما الاقى فيه حادثه عن خطأ دكتور اول امبارح واحده خرجت من المستشفى بعاهه مستديمه فى رجليها

وقبل كده طفل صغر مات من الاهمال قبل كده دكتور نسى فوطه يلا ممكن نسمع فى يوم انه ينسى موبايله او ينسى ايده ويخيط عليها جرح المريض طيب بجد ده بيبقى سببه ايه الدكتور مثلا مش شاطر مش كويس او ياعينى بيجى على حظ المريض ده ويبقى دكتور مثلا مصدع او عنده مشكله وسرحان فيها؟؟؟؟ طيب احنا ذنبنا ايه

ذننا اننا وثقنا فى الدكتور ده ؟؟ المهم الحاجات دى بتحصل فى المستشفيات الكبيره؟؟ ولا ايه يعنى؟؟طيب انا مره رحت لدكتور كانت ودنى وجعانى ؟ رحت صرفت العلاج لقيته كتبلى قطره لعينى وبرشام للبرد والحاجت دى قلت ممكن يعنى فى مغزى للموضوع مع انه قلى القطره دى هاتريحلك ودنك خالص؟؟طبعا حطيت القطره فى عينى

المهم احط فيها ولا اى حاجه والا الهوا بالعكس والله تعبت اكتر رحت للدكتور تانى ولما شاف العلاج قالى ايه ده ده مالو ومال التهاب الاذن الوسطى وادانى علاج تانى علشان اخده رحت لدكتور تالت وسئلته ولما قالى ده علاج كويس اخدته طيب ازاى والمفروض ان الاطباء دول هما اللى نثق فيهم لابعد الحدود وبنحط حياتنا تحت اديهم ده اهمال ولا ايه بظبط ولا عدم تركيز ولا مثلا لما نروح لدكتور عجوز شويع بيبقى نسى بقى وجالو زهايمر زى ما هيا شوطه نسيان وواخده البلد طيب انا عندى فكره نروح لدكتور شاب لسه متخرج اه لما يوصفلنا دوا غلط نقول بقى انه لسه صغير ومعندوش الخبره الكافيه طيب ايه رايكو نروح لدكتور بين البنين يعنى لكبير اوى ولاصغير اوى ولما يتلغبط عندو عذر برضه مراته منكده عليه اولادو مجنينيو يلا مهو هنعمل ايه الانسان مش معصوم من الغلط؟؟

بس لا كله الا ده المفروض الدكتور لما يجيلو تحت ايده عيان يعمل اللى يقدر عليه علشان يحافظ على حياته لكن الاخطاء اللى بتودى الناس االاخره دى او حتى تسببلهم عاهه هما كانو فى غنى عنها دى المفروض متحصلش

وفيها ايه لو الدكتور احتار فى حاله معينه او نسى يعمل ايه يحول المريض على دكتور تانى هو بيثق فيه ؟؟ ايه مستعظم اوى ايه خايف يقولو عليك دكتور مش شاطر ؟؟ لا انت كده بتكون شاطر لانك بتبقى خايف على حياه اللى قدامك اللى حط ثقته كلها فيك

يادكاتره فى ناس بتستخر تروح للدكتور عشان تصرف على عيالها وماشيين بلمسكنات وتقول عيالنا اولى بفلوس الكشف والدوا يبقى هو ده جزاء الناس دى لما تقع وتتعب اوى وترحلكو تستنجد بيكو؟؟؟ بس طبعا لازم نقول ان فى دكاتره كويسين زى ما فى دكاتره خايببين بس نعرف ازاى الدكتور الكويس من الوحش هانسئل الممرضه مثلا اللى بتبقى عنده او فى المستشفى طبيعى انها تقول ممتاز نسأل العيانين اللى جايين عندك ماطبيبعى انهم يقولو كويس اومال احنا جايين ليه ممكن واحده تكون خبطلها علاج وطلع صح وكويس اوى وتقول عليك ممتاز؟؟؟ وتيجى علينا احنا وتتلغبط ده بقى بيبقى نصيبنا كده ولا عدم تركيز منك ولا ايه بظبط؟؟؟

مش عارفه اقول ايه غير ربنا يرحمنا ويبعدنا عن الدكاتره الخايبين

2007-11-19T11:31:00.000-08:00

كل سنه وانا طيبه
انا كملت انهرده20 سنه بالتمام والكمال

عجبتنى اوى دى

2007-11-15T13:55:00.000-08:00

عبقرى والله ياجاهين

وحشتينى اوى

2007-11-14T13:39:00.000-08:00

وحشتينى اوى اوى بحتاجلك كتيييييييييير واكتشفت انى عمرى

ماهعوضك ومش هلاقى حد غيرك هنا

لما بحب اتكلم مع حد مش بلاقى اد ايه بحس بقيمتك وبتمنى اركب اول طياره واجيلك جرى

بأعد مع نفسى واتخيل انك قدامى واعد اتكلم معاكى

ياه لما بأعد اتخيل اننا بنأعد نحوش الكلام والحكاوى كل سنه عشان نأعد نحكيها لبعض اخر السنه فى الاجازه والله بضحك على حالنا ده

بتمنى تيجى تأعدى معايا تانى مصر وحشه اوى من غيرك صدقينى مش عارفه اروح اى مكان احنا كنا بنروحو مع بعض بحس انى كده هاخونك لو نزلتو لوحدى

بحبك اوى بحبك اوى اوى

وحشتينى اوى

الكلام ده لاعز انسانه فى حياتى كلها (ليكى انتى يامنال)...... بتمنى انك تشوفى الكلام ده فى اقرب وقت مش عارفه ليه

نفسى اقوله ليكى دلوقتى

خلى بالك من نفسك ومتخليش اللى بالى بالك يدايقك

الطفل الوحيد

2007-11-14T01:24:00.000-08:00

زماااااااان ايام تيته وجدو لما كانت جدو بيسئل تيته اول ماياتجوزو

نفسك تيجبى كام بيبى كانت بتقولو عايزه اجيب فريق كوره نصهم بنات ونصهم صبيان ولما بابا جه يسئل ماما نفسك تجيبى كام بيبى قالتلو هما اتنين او تلاته كفايه اوى علشان نقدر نربيهم كويس ونجبلهم اللى نفسهم فيه كله لما بقى تيجى تسئل اى حد دلوقتى نفسك تجيب كام بيبى يقولك هو كفايه اوى واحد عشان نقدر نربيه كويس وندخله احسن مدارس ونجبلو اللى هو عايزه وطبعا الراى مابيختلف الا بختلاف الظروف يعنى زمان كانو بيجيبو اطفال كتير اوى علشان كانت متطلبات الحياه قليله جدااا وكانت رخيص وكان التعليم مجانى وغيره وغيره لما بابا وماما جم وكبرو واتجوزو جابونا حبه صغنانين علشان متطلبات الحياه كترت وبقينا عايزين موبايل وكمبيوتر وتلفزيون وبلاى استيشن ونروح نادى وعايزين عربيه وغيره وغيره وكمان مننساش ان الحياه بقت غاليه جداااااااااا وعشان احنا منعرفش متتطلبات اطفالنا هاتبقى ايه وهاتبقى الحياه عامله ازاى ايامها واقتصادنا هايتدهور اكتر ولا لا فابنقول عايزين بيبى واحد بس

(ياه انا طولت اى فى المقدمه دى رغايه بقى معلش نخش فى الموضوع بقى احسن)

اللى انا عايزه اقوله اننا منعرفش ان تربيه الطفل الواحد اصعب بكتير من تربيه طفلين او تلاته لانه يااما بيطلع مدلل جداااااا يابيطلع معقد جدااااا

بيطلع مدلل بقى لما ماماته وباباه يدلعو ويجبولو كل اللى عايزه فى لمحه بصر ويشيلو عنو مسئوليه اى حاجه وعلى طول تبقى كلمه كفايه انو معندوش اخوات فى بقوهم وبيححلو بيها اى خطئ ليه ومايعقبهوش عليه كان ان ملوش اخوات ليه ده عقاب ليه وطبعا الطفل ده بيطلع عديم المسئوليه عندو لا مبالاه ومستهتر فى حياته وبيفشل

واللى بطلع معقد ده بقى بيبقى ماماته وباباه عايزينه يطلع حاجه كبيره اوى وطبعا الكل نفسه فى كده بس دول بيبقوا حاطينله خريطه لطريقه وبيحسو انه لو طلع عن الخريطه دى هايموت او مش هعايبقى حاجه وهما اللى بيخدو قرراته كلها وبيختاور اصحابه ولبسو وغيره وغيره حتى بيوصلو انهم اوقات بيختارو العروسه ليه بنفسهم وده بيبقى متعقد من حياته انو مابيبقاش حاسس بيها اصلا لانه مخترش حاجه فيها ونلاقى لما باباه وماماتو يتوفو بيحصلو حاجه من الاتنين يابيفشل وينحرف ويعمل كل اللى مقدرش يعملو يابيبقى راجل طوع مراته لانه بيكون اتعود انه ياخد الاومار طول حياته من حد وهو مايحددهاش وطبعا الكلام ده بينطبق على البنات كمان فابتبقى سلبيه ومتعرفش تواجه اى مواقف فى حياتها

وطبعا لكل قاعده شواذ ياعنى اوقات نلاقى اطفال وحيدين بس كويسين جداااا ونفسيتهم مظبوطه ولاهما مدللين ولاهما معقدين بس ياترى بقى احنا طفلنا الوحيد اللى كلنا عايزينه ده هايبقى من شواذ القاعد دى وياترى برضه هايجى على ولادنا يوم ويقولو احنا مش هانعرف نجيب بيبى عشان مش هانعرف نأمن مستقبل ليهم زى محنا فضلنا نقلل فى عدد الاطفال كده فى حياتنا؟؟؟

ستات الحكومه

2007-11-11T06:32:00.000-08:00

انهرده نزلت عشان اطلع بدل فاقد للبطاقه بتاعتى

المهم نزلت الساعه9 من البيت ورحت على السجل المدنى ووقفت ادام ست من ستاتنا المبجلين العاملين والمناصرين لقضيه حريه المراءه وعملها وقبل مااتكلم لاحظت ان الشباك اللى قدامها مقفول وهيا اعده هاتك فى السندوتشات اكل تأملتها شويه وبصيت حوليها حسيت ان كلهم قاطعيه وحده شكل واحد الايشارب مبهدل على دماغهم وحالته بلبلاء والبلاه حواجبهم مرفوعين من عند الاطراف ومتقاربين من الداخل ومحفور بينهم بلئجنه والشاكوش علامه ميه وحداشر الانف منفوش لابعد الحدود ليس فقط لشفط الاكسجين بل ايضا لشفط العملاء المقلقين والفم مرسوم علامه قوس لاسفل

وبعدين سمعت صوت ورايا فى الطابو بيقولى انتى هاتفضلى متنحه كتير ماتخلصينا عايزين نشوف مصالحنا فوقت من احلامى اصدى من كوابيسى وفتحت الشباك الزجاج وقلتلها صباح الخير يافندم ردت عليا من غير ماتكلف نفسها مشقه انها تبصلى وراحت قايلالى انتى مش شايفه الشباك مقفول ادامك فتحتيه ليه قلتلها نعم ومنتهى البراءه فى عينى راحت عادت كلامها وقالتلى بعدها اقفلي الشباك قلتلها اقفله ايه انا عايزه اخلص قالتلى لما انا اتنيل افطر ولا انتو على طول متسربعين كده وراحت رازعه الشباك وقافلته وقالت عشر دقايق وتعالو تانى طبعا فضلنا ملطوعين فى الموقف ومماشيناش اللى يطلع من الطابور ينسى انه يدخله تانى المهم خلصت طفح هيا وفتحت وقالت افندم بوشها المكرمش من كتر التكشيره قلتلها على اللى انا عايزاه قالتلى انا عايزه صوره من بطاقتك القديمه قلتلها صوره ازاى وهيا ضايعه اصلا راحت نافخه فى وشى وقالت انتو لازم كده تطلعو عينا وتتعبونا معاكو وكل اللى عملتو دخلت اسمى على الكمبويتر اللى ادامها وداست انتر طلعتلها كل البيانات اللى هيا كانت محتاجاها من البطاقه ياسلام بصراحه تعبتها جدااااا معايا وهيا بتعمل الاجراءات بقى بتكلم صاحبتها على واحده زميلتهم تانيه وبتقولها دى مش ممكن ابدا مابتشتغلش خالص وانا بعملها شغلها اوقات لما انا بقى بيبقى عندى عذر مابتعمليش اى حاجه لالا بجد دى مش شايفه شغلها وملهاش لازمه كانت على لسانى كلمه فاقد الشئ لا يعطيه وكان نفسى اقولها وهيا بتتكلم بس قلت وعلى ايه خلينا احسن مكتومين المهم خلصت ورقى وراحت قافله الشباك وهيا نادت على الفراش بصوتها اللى عامل زى الرعد وقالتله اعملى شاى وقالت للورايا تعالى كمان عشر دقايق وهيا بتتزهق وبتقول الواحد قرف شغل من الصبح طالع عينه للعلم انا كنت اول زبونه اصدى عميله تجلها من العملاء

انا من زمان بقول المفروض الستات دول يأعدو فى بيتهم ويسيبو مكانهم للشباب اللى زى الورد يشتغلو فيه بدل مهم مترصصين لينا على القهاوى والستات تأعدفى بيتها معززه مكرمه بدل مهما متبهدلين(زى مابيقولو)ومبهدلنا معاهم

كليه البنات

2007-11-10T08:27:00.000-08:00

رحت عشان ادفع ا لمصاريف زى كل سنه وطبعا لاقتها زادات زى كل الجامعات برضه
اول حاجه لاحظتها غريبه ان شباك دفع المصاريف فااااااااضى مش زى كل سنه اول ماشفت كده قلت الحمد لله مش عشان هو فاضى لا عشان ربنا رزقنى بأب قادر انه يدفع المصاريف وبسرعه الحمد لله الحمد لله حسيت بقيمه اهلى ساعتها وحسيت ان الغربه ليها نتايجها برضه بس اللى هنا يعملو ايه بقى ربنا يكون فى عونهم وانا باخد اذن المصاريف الست قالتلى بيقترحو انهم يخلو مصاريف السنه الجايه الف جنيه قلتلها ايه ينهار اسود الف جنيه اذا كان البنات مش ادرين يدفعو خمسميه جنيه هايجيبو الف جنيه منين قالتلى لسه بيدرسو الموضوع قلتلها مهم ادام بيدرسو وفيا زياده فلوس ليهم يبقى القرار محسوم طبعا كلنا موافقون
فكرت قلت طب مهو الواحد كان دخل جامعه خاصه بدل مهو اعد فى كليه البنات فى البهدله والمدرجات المعفنه واللى مفيهاش ريحه المروحه والار اللى كلها تراب مش هاين عليهم يحطولنا حتى شويه خشي نمشى عليهم بدل البهدله اللى بنشوفها وكمان البنشات مكسره وتقرف بجد ومافيش ميكرفون يوحد ربنا شغال
طيب هايزودو المصاريف ليه هايعدلو فى الجامعه لو هاينضفوها انا مافقه لو هايصلحو عيوبها انا موافقه لو هايجيبو مراوح ويبيضو المدرجات ويحطو بنشات تصلح للاستخدام الادامى موافقه لو هاتبقى جامعه محترمه والله موافقه لكن مافيش اى حجه بجد الجامعه من جوه ولا كأنها خرابه
دنا لو كنت دخلت جامعه خاصه كنت هدخل الكليه اللى بحبها والمجال اللى كان نفسى فيه واعد فى حتت محترمه ومنظر كويس حوليا اه مافيش تعليم طيب مهو عندنا مافيش تعليم برضه واحد يعنى بس نقول ايه بقى فى اولاد الحلاال اللى خوفو بابا من الجامعات الخاصه
لا بجد حرام اوى اللى بيحصل بجد والناس الغلابه هاتعمل ايه اللى جايين من اخر الدنيا كليه البنات كلها من الاقاليم يعنى برضه ناس على اد حلها وكل امالهم يعلمو بناتهم عشان يساعدوهم يبقى ده ردنا عليهم يبقى ده اللى نجازيه بيهم
فرحت اوى بالمظاهات والوقفه الاجابيه اللى حصلت فى كل الجامعات المصريه اللى بتعترض على المصاريف اللى غليت ورفع الدعم من على الكتب وغيرها بس محصلش ده عندنا فى الجامعه معرفش ليه والبنات اكتفو انهم مايدفعوش المصاريف والتزمو الصمت القاتل
ربنا يكون فى عونهم وفى عون اهاليهم
ومنهم لله الظلمه المفتريين منهم لله حسبى الله ونعم الوكيل

ياترى ابو الهول هايبقى ذكرى وصور مش اكتر

2007-11-09T18:52:00.000-08:00

أبو الهول (Sphinx)، هو أثر مصرى على هيئة تمثال بجسم أسد ورأس بشري. ويعتقد أنه يحرس المقابر والمعابد. وقد حاكى الفينيقيون والاغريق إقامة تماثيل تشبه أبو الهول، إلا أنها مجنحة ورؤوسها كرأس امرأة. ويعد تمثال أبو الهول بالجيزة أشهرها، وقد نحت من الحجارة ورأسه تمثل الملك خفرع الذي عاش بالقرن 26 ق. م. وطوله 24 قدما وارتفاعه 66 قدما. ويوجد عدة تماثيل مصرية شكل أبو الهول تمثل الملوك واله الشمس، وغالبا مايكون وجه التمثال ملتحيا، فقد وضعت عدة تماثيل على جانبي الطرق المؤدية للمعابد الفرعونية بطيبة، الا أن رؤوسها كرؤوس كباش.
وتمثال أبو الهول من الألغاز القديمة لكن يعتقد بشكل كبير أنه للإله حور فقد ذكر أكثر من مرة على أنه الإله (حور إم أختى) حور في الأفق وهو صورة من الإله أتوم أكبر الأله المصريه وهو الشمس وقت الغروب، وقد زاره أكثر من ملك ونقش ذلك بمناسبه الزيارة منهم (رع-مس-سس) الثانى أو رمسيس الثانى، والملك توت عنخ آمون الذى أقام استراحه بجوار أبى الهول، إلا أن رعمسيس الثانى طمس نقوشه ووضع اسمه بدلا منها. ومن العصر الرومانى زاره الإمبراطور سبتموس سيفروس.
وقد استوطن منطقه أبى الهول قوم من الجنس السامى (الكنعانيون)، ووحدوه مع إلهم حورون أو حورونا وذلك في تماثيل على شكل بوالهول ولها لحى لذلك فمن المعتقد أن أبو الهول ماهو إلا تمثال للإله حور في شكل الملك خفرع.
ومن المعروف أن تمثال أبو الهول كان محجراً قبل أن يفكر الملك خفرع في نحته على شكل تمثال، وينظر هذا التمثال ناحية الشرق لذا قد تم تغيير الجهات الأصلية في القرن الماضى لتوافق نظر أبو الهول، وكان أبو الهول قديماً يسمى عند الفراعنه بـ(بوحول) وكان الفراعنه يطلقون على الحفرة التى بها أبو الهول (برحول) أى بيت حول، وعندما جاء الفرنسيون إلى مصر كانوا يقولون عنه أن أسمه (بوهول) لأنهم لاينطقون حرف الحاء ثم حرف أخيراً إلى (أبى الهول). وكان قبل الحملة الفرنسية مغطى بأكمله في الرمال بجوار الأهرامات الثلاث ثم تم الكشف عنه أثناء الحملة الفرنسية وذلك عندما قامت عاصفه وكشفت عن جزء صغير منه، وعندما تم التنقيب وإزاله الرمال وجدوا تمثال ضخم وهو أبو الهول.
إن أبو الهول ليس حارسا للقبور الفرعونية وإنما يعبر عن حالة التمرد الإشراكية بالله في ذلك العصر.

دى كانت فكره عن ابو الهول طبعاعارفين كل ده بس حبيت ااكد مش اكتر

ابو الهول ده بقى احتمال يقع ومايبقاش موجود ومش هانعرف ناخد اولادنا نوريهم رمز من حضاره بلدنا زى مابونا وامنا عملو معانا بجد لما سمعت الخبر ده حزنت جدااااااااااااااااااا

واللى حصل بقى فى ابو الهول ظهور طبقه من الجير الابيض على سطحه وتشققات طلع فيها طحالب خضراء

وبيقولو انه هايقع خلال 60 يوم

ربنا يستر بقى اوبو الهول التانى مايفضلش 7الاف سنه عشان يقع هو كمان

وربنا يستر على ابو الهول الاولانى ويعرفو يحلو مشكلتو بسرعه

2007-11-09T17:25:00.000-08:00

اهلى ... اهلى

الواحد قام الصبح بدرى واعد يجهز فى هدومه الحمرا طبعا ولبس ولغبط وشو بشويه الوان واشترينا اعلام وروحنا من الضهر الاستادعشان نلحق طبعا واعدنا نشجع ونشجع ونقول باعلى صوت اهلى اهلى ونطبل نزغرط ولا كأنه فرح بنت اختى

المهم المتش ابتدى وجه النجم ادانا تلات ضربات خلونا اتصدمنا واتكتمنا

اعدنا مكنا مسهمين وبعد الماتش ماخلص والناس مشيو واحنا برضه اعدين متنحين بكل معنى الكلمه والامن جالنا يوقلنا يلا خلاص واحنا نقول لا ملناش دعوه مش هانقوم احنا عايزين نكسب يولاد الحلا ل خلاص لا مش هانقوم مش هانقوم والجلاله خدتنا تانى فى التشجيع والهتاف وطبعا خدنا شلوت فى الاخر واطردنا

طبعا بعد كل ده صوتنا راح وبقينا من ذوات الاحبال الصوته المتهتكه المتهربده

وروحنا البيت من التعب ضربنا غطس فى السرير ونمنااااااااااااااااااااااااا

يعنى منبناش غير التعب والبهدله حرقه الدم

( ده كله كان كلام من بؤ اهلاويه متعصبه قابلتها بعد الماتش وسئلتها سؤال برئ هو ايه اللى حصل؟؟ احنا كسبنا ولا خسرنا وقالتلى بالفوم المليان احنا اتوكسناوبعدين اعدت تحكيلى السابق شرحه اعلاه)