Wednesday, June 25, 2008

ااحمدو ربنا


هاقولكو على شويه عادات فى الجواز بره مصر يعنى ممكن تعرفوا انكم فى نعمه وتحمدو ربنا


لما ينوى الشاب اليمنى انه يتجوزه بيروح هو ومامته بيت البنت ولازم وحتما ولا بد انه ياخد هديه غاليه جداااا معاه(مش دسته جاتو وخلص نفسك)
سواء بقى البنت عجبته او لا او اترفض او اتقبل
ولازم الهديه دى تكون بحوالى 150 دولاراحسبوها انتو بقى
وفى كل موسم دينى لازم يجبلها هديه زيها بظبط فى القيمه ولما بقى الحمد لله كل شئ يتم ويجى وقت عقد القران

لازم الشاب الظريف اللطيف اللى هايتجوز يجيب للعروسه:::ايه بقى ياحلويييييييين؟؟

سلسه ذهب طولها متر وحزام من الذهب واسوره وحلق ده فى كتب الكتاب بس هديه يعنى للعروسه
ولازم الشاب الظريف اللطيف اياه اللى هايتجوز يبعت لعروسته كل يوم مصروفها لحد مايتم الزفاف عليها
وقبل ليله الدخله لازم الشاب اياه برضه يدفع حاجه اسمها الشرط وهو قيمه الدهب ده بس فلوس لبابها ومامتها وقرايبها كلهم يعنى خراب بيوت مستعجل
وفى ليله الدخله بقى لازم يكون فى جيبه15 الف ريال
بتاخدها عروسته
قبل ماتكشف الطرحه من على وشها وبيسمى المبلغ ده حق الدخله(ها 15 الف عشان يشوف وشها واخدين بالكو)؟
وبيستمر حفله الجواز اربع ايام
وطبعا كلو على حساب صاحب المحل اللى هو؟؟ اه صح الشاب اللطيف الظريف اياه

وفى الامارات لازم العريس يجيب للعروسه وام العروسه كل واحده كيلو دهب هديه
ويرمى تحت رجل العروسه دراهم دهب كتييييييييييير
وهيا ماشيه(كتنا نيله فى حظنا الهباب)؟

وفى باكستان بقى ها شبكه العروسه بتبقى عدد كبير جدااا من الاساور الذهبيه
يبدأمن 7 لحد 17 اسوره ولازم يكون عدد فردى مش عارفه ليه محدش يسألنى؟؟؟


ده بس عشان تحمد ربنا يارجاله مصر وتعرفوا ان الجواز عندكو مش مكلف نهائى والبت الغلبانه اللى بتتجوزوها بتساعدكو كمان فى الجهاز ولا جنيهات دهب بتترمى تحت رجلها ولا حزام دهب ولا غيره
ونبى احنا لينا الجنه



36 comments:

amraction said...

فى بعض البلاد الافريقيه.. العريس بيجرجر العروسه من شعرها على الارض من مكان المدبح.. اللى هو كتب الكتاب بتاعهم ..لحد بيت الزوجيه
وفي امريكا واوروبا الولد مش مطلوب منه غير انه يقولها بالترتيب.. ما تيجى نشرب حاجه سوا...بعد كام شهر.. بحبك.. وبعد كام سنه(بعد ما يجيبو عيلين تقريبا) يقولها تتجوزينى.. ويجيبها خاتم(خاتم واحد.. وان خاتم..بس) تقوله اه..ويعيشه فى تبات ونبات.. ويكملو على العيلين اللى جابوهم.. يجيبو واحد كمان

احمدو ربنا انتو كمان اننا فى مصر بنعرف نجيبلكو دهب من اساسه..
عالم عجيبه..ده حتى البنات هناك تستاهل.. شعر اصفر وعيون زرقا.. مش هنا.. غم ونكد

بطوط حبوب said...

وف مصر بيمضى العريس ع العفش

amraction said...

اهو الراجل قلك كمان اننا بنمضى على القايمه والعفش.. اللى بسببهم بتودونا السجون.. ارحمونا بقا

ftafeet said...

ههههههه ايه ده ياعمور جرجه شعر ايه حرام عليك ياراجل وشعر اصفر ايه وعنين خضرا ايه مافيش احسن من المصرى يواد قال هم ونكد قال ونبى انت ماتعرف حاجه ياعم رووووووووووح

:::::::::
وانت يابطوط

ايه مدايقك اوى قايمه العفش ياسلاااااام بتتلككو والله

نوسه وريمان فى هاكونا مطاطا said...

هههههههههههههه

يا سلام

والله يعنى كده رجاله مصر مرتاحين ع الاخر

مالناش دعوة بقه

احنا مش هنتجوز الا من اليمن

عجبتنى اوى موضوع الهدايا الروعه دى

اهى دى الهدايا ولا بلاش

واهى دى العرسان ولا بلاش

هههههههههههههههه

تقبلو مرورى

ريمان

لكن حسام مش هنا الوقتى لو كان معايا كان هيكون ليه راى تانى

هههههههههههههه

سلام

ذربونة هانم said...

yalahwe yalahwe
da elwa7ed yehager 2a7san ba2a le balad mn el2etnen dol

wallahe elfekra nawnewet fe dema'3e 5alas
:)

Unknown said...

هههههههه
موضوع جامد موووت بجد ...
مدونه رائعه..
ادعوكى لزيارة مدونتى المبرمج المحترف
تحياتى الخالصة :D
عمر.
O.Spiderhack@yahoo.com

blue-wave said...

دا احنا هنا فى نعمه مش واخدين بالنا منها
اللهم لك الحمد:)

مواطن مصرى نايم said...

انا موافق اعمل كل ده
ايا كان
بس لو معايا فلوس زى اليمنين و الاماراتيين
يعنى كل ده ميجيش حاجة فى الفلوس اللى معاهم
لكن المصرى اساسا لاقى العيش عشان يجب
كيلو دهب
هو كيلو بسكوت بالشيكولاتة
نعمة و خير

و على رأى الاعلان

كوفرتينا عالعريس ...موافقين
يبقى حنتجوز و نهيص
كوفرتينا فالفاتحه ...موافقين
تبقى الجوازه ناجحه
كوفرتينا فى الخطوبة...موافقين
تبقى الجوازة مطلوبة
كوفرتينا فالفرح...موافقين
تملى الجو مرح

أية الشقية الشعنونة said...

يا بنتى دحنا فى مصر شوية شوية هندفع المهر
البلد كلها جعانة
ههههههههههههه
تحياتى بوست خفيف ولذيذ اوى

sebofy7alo said...

الحمد لله أنا اللحق أتجوز واحدة من جنوب أفريقيا المهر بتاعهم موز وسوداني
وكلة موجود في مصر
آل دهب آل

http://kasperb4.blogspot.com/ said...

ماهو متنسيش بردو ان البنت الغلبانة اللي بتقولي عليها دي لو مساعدتناش ف الجواز هتفضل قاعدة جمب مامتها يناقروا ف بعض ليل ونهار

يعني مجبرة اختك وليست بطلة هههههههههه

بس بردو الحمد لله على كل حال

Unknown said...

شكرا لمرورك الكريم ....

شرفتينى فى مدونتى والله المدونة نورت...

ftafeet said...

ريمان نورتى المدونه عندى

شوفتى بقى ازاى احنا بيضحك علينا فى مصر

احنا نعمل هجره جماعيه لبلاد الخليج نقسم نفسنا عليها وحسام مالوش كلام ادى الادله والبراهين تثبت اننا مظلومين

:::::::::
ذربونه هانم

هناخدك معانا فى الهجره
ونسافر نتجوز ونهيص هدايا
نورتى البلوج ياقمر

ftafeet said...

المبرمج المحترف ميرسى على مرورك
نورت المدونه

::::::::
blue wave

اه شفت بقى انكم لازم تحمد ربنا وتبوسو اديكم
شعر ودقن اصدى وش وضهر

شرفتنى ونورت البلوج

::::::::::::

ftafeet said...

مواطن مصر نايم

عارف انا موافقه بكوفرتينا ياسيدى يلا ملكش حجه تتجوز اهه
:::::::::::
ايهالشعنونه


ميرسى على مرورك ياقمر نورتى البلوج عندى

منا بقول برضه اننا مظلومين فى البلد دى محدش مصدقنى

ftafeet said...

سيبو فى حالو

كده برضه ياشريف تبدى بنات افريقيا عن بنات بلدك ماااااااااااشى

ال سودانى ال

ftafeet said...

الام وامال

لالالالا مين قالك احنا خلاص هناهجر ونروح اليمن ياعم
انا عن نفسى فى الامارات يعنى مش هاعد جنب مامى اناقر فيها

وهابعت لكل بنات مصر يجو هنا عندى ونسيبكم لوحدكم فى مصر

نياهاهاهاهاهاها

Bongo said...

ههههههههههههههه

ده احنا غلابة اوووي علي كده
دول يبوسوا ايديهم وش و ضهر انهم في مصر
كل ده و بيعترضوا كمان !!!

بوست لذيذ :D
تحياتي يا جميل

mohamed said...

ههههههههههه الحمدلله اني مصري

Yuri Eisenheim said...

فى بعض البلاد بردو العريس لازم يرن العروسه علقه

وبردو ممكن يجرها من شعرها فى بلاد تانيه

يعنى الموضوع مش كله دقع دفع

ماشى

yuri

shirry said...

الحمد لله
انتي عارفة انه في الهند البنت هي اللي بتتقدم للراجل وهي اللي بتدفع المهر كمان

بس علي الحاجات اللي انتي بتقوليها دي؟
يبقي احنا لنا الجنة

علي فكرة لو لقيتي عريس امسكي فيه بايدك وسنانك
محدش بيلاقيهم في مصر بالساهل

قوس قزح said...

والله احنا غلابة فى كل حاجة مش بس موضوع الدهب و الشبكة

كراكيب said...

لا واييييييييه ونسبة العنوسة برده عندنا زايدة
واتعملت جروبات على الفيس بوك لا للشبكة ولا لارتفاع تكاليف الزواج
والله احنا غلابة

ححححححححح اللي يشوف بلوة غيره تهون عليه بلوته

أية عفيفي said...

امال ايه الى بيقولوا فمصر ده

العريس بيدفع دم قلبه وبتاع

يبقى هناك بيدفع ايه!!!!!!!!!!!!!!

ftafeet said...

bongo
elblog nawar walahy mercy 3ala zo2ek
shofty b2a begad e7na 3'albanen
:::::::::
mohamed

aewa aewa 3ayzak tefdal ta7med rabena keda kteeeeeer

nawart elblog
::::::::::
Yuri Eisenheim
mmmmmmm eh el3onf dah kolo ya3ne enta malfatsh nazark 3'er eldarb ahaaaa shaklak shreeeeeeer
bs sad2ny kolo byedfa3 el taman fi el 2akher we betl3 3eno

::::::::::::

ftafeet said...

shirry

ah 3arfa ana 7ewar elhend dah ma ana mardetsh ageb serto 3alshan ma7desh y2ol 3alena moftareen

we aw3edk awel ma 2ala2y 3aras hamsek feh zay ma akon msekt 7aramy

::::::::::::::

Ahmed Al-Sabbagh said...

غريبة اوى
انا علقت على البوست ده فى الاول
بس تقريبا كان تعليق حذفتة الرقابة من كتر الغيط اللى كنت فيه
دول يا بنتى عايشين فى البطيح قال كيلو دهب قال
الله يرحم جدى كان دايما يقولى اخدت جدتك بالهدوم اللى عليها
عموما ديننا ماقالش كدةوقال نيسر الجواز
بس هما يمكن عشان مستريحين ماديا
انما احنا لو ده حصل عندنا
هتبقى نسبة العنوسة 100% اكيد

بس بوست جامد جدا
ودمك خفيف موت كالعادة

تحياتى وتقديرى

احمد

بنوتة said...

فاتافيتووووو
_-_-_-_-_-_-_
اتشرفت بزيارتك اكيد اي بنت تكون عاوزة تبقى مرات الشاب ده بس انا لأ حيصعب عليا اه مفرود ساعات نتقل عليهم بس بنتقلش عليهم لدرجة اننا نفتسهم


سؤال
____
ده برضه بيحصل بعد الجواز
_______________________
سؤال
____
هل بيعمل كده برضه ما اولاده انه يشترلهم حاجات ام لا

مواطن مصرى نايم said...

انا جبت كوفرتينا
اجى امتى بقى
انا جاهز اهوه
قولتى انك موافقه عالكوفرتينا
ممكن كمان اجيت واحده حاجة ساقعه صاروخ
اى خدمة اهوه
عامل احلى شغل اهوه

بس للامانة بجد
انا بإذن اللى ربنا يكرونى و لما انوى اخطب
حجيب ان شاء الله شبكة محترمة
يجى بخماشر تمناشر جنيه حلويات
ههههههههههههههه
لا ناوى اجيب طقم كوليه
هه ايه رأيك موافقه
ههههههههههههه
تحياتى
eslam

نوري said...

اه والله ياختي يوكسنا علي نيلتنا
احنا الي بنات خايبه وحياتك ياختشي
قال حب قال بلا وكسه

بقلك تجي نغير جنسيتنا
ونبقي امراتيين ولا يمنيين
مش كده اضمن لنا

بس بيتهيألي ان بعد ده كله
وبعد الجواز بيطلعه علي جتتها
وبيطلعوا عنيهم

يلا بقي دع الخلق للخالق
بست وشز فور يو

FaceMoon said...

انا مش عارفة اية لازمة التعقيدات دى كلها
بس بجد منك نستفيد على كدة شباب مصر مدلعين اوى بس برضة اجدع ناس فى الدنيا
تحياتى

د/اجدع بنوته said...

انا هحول اليمن

خلصتتتتتتتتتت

هههههههههههههههههه

الواحد يروح يكوم مستقبله

احلى تكويم بصراحه

وحشتينى يافتفت يارب تكونى بخير

فتوح أبو المفاتيح said...

هههه
خيييير كتير أوي
انا كدا شكلي ممن ارشيكي
عشان تخبي البوست دا
كدا محدشهيعرف يتجوز يا انسة
انت كدا بتقطعي رزقنا
دهب ايه وعفش ايه
الحاجات دي ملهاش لازمة
يا جماعة انتم بتشتروا رااااجل
عارفين
زمان لما كانوا بيروحوا سوق العبيدكانوا بيدفعوا كام في العبد
دا بقا جا ي ببلاش
بقا فيه أحسن من كدا
يا فتفوتة ؟؟
يلا
وهو كله خير
ومن قدم شئ بيداه التقاه
وزهنيالك قاعل خير ثواب
يعني
و عريس حليوة ولسا متخرج
تعتقدي انه يجيب دهب بأكتر من 10000 جنيه
طب دول يجيبوا ايه ؟؟؟
غويشة
وخاتم
ولوا قضوا تمن سلسة يبقا بركة وميت فل و اربعتاشر
هيييييه\
دنيا
خير
محددش عارف الخير فين

Nada said...

ههههههههههههه
ان شاء الله عنه متجوز اصلا يا فتافيت
يالهلى
طب تعرفى قى ان فى بلد بس مش فكرة اسمها
عشان الولد يتدوز بيجيبو البنت ويحطوها فوووق نخلة عالية وبعدين الولد يقعد يطلع فوق النخلة دى عشان يوصلها
وكل ميقع اهل العروسة يضربوه او حاجة زى كدة
ههههههههههههه
دحنا غلابة والله

seven said...

وفى الهند
العروسة هيه اللى بتدفع كل حاجة
والعريس هوه اللى بيتشرط كمان
ومش بيدفع مليم فى الجواز
بس عاوز اقول انه بشكل عام
عمر الفلوس مهيه اللى بتعمل جوازه ناجحة
اهم حاجة ان ربنا يكون مبارك فى الجوازة
ولو اتصر مليين
مش ده اللى بيجيب السعادة يعنى



حقوق النشر محفوظه

بصوا بقى حقوق الفزلكه و والتفكير والكتابه والنشر ووجع الصوابع على الكى بورد محفوظه
ماشى وقد ازعر من انزر اصدى اعذرمن انذر
سلااااااااااام