اه علب زبادى
احنا مش كنا بنحب الزبادى
كلنا لما بنأعد نفتكر واحنا صغيرين بنسرح ونضحك ونبتسم ويترتسم علينا ملامح غريبه وجميله طيب ليه بنسرح ليه بنفتكر ايه؟؟؟؟
ياترى بنفتكر االمقالب اللى كنا بنعملها واللعب فى الشارع ونطلع مبهدلين ونستحمى بالعافيه عشان عايزين ننام
والضحكه اللى كانت بتطلع من قلبنا صافيه وجميله تخلى الدنيا كلها تضحك
انا عن نفسى بفتكر اللعب فى الشارع مع اصحابى صبيان وبنات
ولعبه صيديه السمك وتيكا على العالى وتيكا على الواطى وكهربا ياااااااااه حاجات كتير بتخلينا نبتسم بس اللى بيخلينى اضحك من قلبى المقالب اللى كنت بعملها يعنى حاجات كتير وكنت باكل كل علقه وعلقه بس ماكنتش بحرم...
يعنى انا مره كنت متغاظه من بنت خالتى عشان كانت ضوافيرها حلوه وطويله
وانا كنت بقرقض ضوافرى سبتها نامت وانا مسكتهم قصيتهم (وهيا بقى نومها تقيل تقل)محستش ولما قامت الصبح اعدت تعيط وانا اضحك فى خباثه
ولما كنت ببقى عايزه لعبه ولا حاجه اعمل نفسى عيانه ولما كنت ابقى مكسله امشى لما كنا بنبقى رايحين مشوار اعمل نفسى نايمه ولما مره اقنعت اختى انى احطلها مكياج وشغبطلها على وشها بالقلم الحبر
وهيا اعدت تعيط وانا كلت علقه بقى سوقع يعنى بس على مين ابدا دنا توتو(على فكره بيقولولى فى البيت ياتوتو)؟؟
...............هو انا طلع عليا اسم توتو من فراغ(قال ايه بيقولو عليا سوسه حرام عليهم ظالمنى)؟
ولما روحنا السيرك
وخليتهم مش واخدين بالهم ورحت نازله تحت فى عرض الاسود
ورحت مدخله ايدى وراسى بين السلك وانا عامله زى الدوده
دخلت ازاى معرفش وقال ايه بحسس على الاسد (اصله قطه) وهو لسه بيدور راح الراجل خد باله وضرب عليه حقنه التخدير دى وضربه بالكرباج وراح شايلنى وقال بنت مييييييييييين دى لا وماما بتبص مين الل يابه بنتها كده بعده جاتلها حاله اذبهلال لما لاقتنى انا
وانا بقى كان عندى هوايه انى اشترى ضفادع انا واصحابى الصبيان او نروح نصتادها عادى يعنى ونرميها على البنات اللى بيأعدو يصوتو علشان نضحك عليهم ولا كانى منهم عادى جدااااااا دلوقتى بخاف امشى على النجيله يااااااااه قول لزمان ارجع يازمان
ومره بقى وقعت فى بلاعه كبيره وانا بلعب
وواحد من المنطقه شافنى وانا بقع ومد ايده جبنى
يعععععععععععععععععععع وكانت رحتى وحشه اوىىىىىىىىىىىىوعييت وكانت حالتى صعبه
وجالى ايامها التيفويد وكنت هامووووووووت
ومره تهت على البحر وملقتش بابا وماما واعدو يدورو عليا لحد ملاقونى اعده مع ناس غريبه باكل سندوتشات(صحيح انا هاوجع دماغى ليه مهما اكيد هايدورو عليا اعد انا اكل واسند طولى انا تعبانه وبلعب طول النهار)؟
ها اكمل ولا كفايه انا من رايى كفايه عليكو كده
لحسن تقولو عليا متشرده ولا حاجه لاسمح الله
نوناااااااا (توتو سابقاااا)؟
56 comments:
يا صباح التشرد.. قدامى ع القسم يا متهم..مقالب وضفادع.. لا وبلاعات كمان
انتى قضيتى طفولتك فى الاحداث ولا ايه
هو لسه في تاني
الله يسامحك ويحسن اليكي
فكرتيني بالايام الخوالي
يااااااااااااااااه
يالا الحمد لله على كل حال
كانت ايام
تحياتي
هههههههههههههههههههه انا و الله قلت انك شقية من صورتك بتاعت البلوج
و اول لمااجى الاقيكى كاتبة كل الشقاوة دى ؟
انا كنت بلم الضفادع بردو و دلوقتى يععع بقرف منهم
و كنت بشترى كمان دود القز متسالنيش ليه قال يعنى هعمل منه شال حرير هههههه
مدونتك خفيفة و جميلة
تحياتى
متشردةايه ياشيخة حد يقدر يقول كدة انت بس دماغك عالية حبتين قوليى تلاتة
ههههههههههههههههه
ايه دا
انا مفتكرش اني عملت اي حاجة من الكلام دا
اخري مرة حطيت صابعين في كوبس الكهربا
و اتكهربت و سكت و مبينتش للي حواليا
بس حكاية السيرك دي رهييييييييبة
ههههههههههههه
هيييييييه دونيا
متكملي الحواديت
:D
ايام كانت جميلة والله
بس تصدقي خوفتيني منك :p :p
ايه يابنتي الشقاوة دى كلها .. دانا الولد مكنتش بعمل نص العمايل دى
ده ايه التوشورد الاوطفالى ده
ده انتى حوادث يابنتى وكل دى بلاوى عملتيها وبراءة الاطفال فى عينيكى
صحيح يعملوها الصغار!!
على فكرة اسمها كيكا ع العالى
جميل اننا نفتكر طفولتنا بس الاجمل اننا نتعلم منها
تقبلى تحياتى
زياره اولى لمدونتك
كان الله فى عونك
كويس انك نفدتى من كل الاحداث دى
ههههههههههههههه اية كل الشقاوة دى
انتى لو بنتى كنت زمانى اتجننت من زمان
وبعدين انا مش فاكرة انى عملت كل الحاجات دى انا كدة مش عشت طفولتى خالص زعلتينى بقى
طيب انا عايزة اعيش طفولتى اجيب سيرك واسد منين دلوقتى
مدونة جميلة وبوست اجمل
تحياتى
تشرد عادى جدا كلنا متشردين صح
هههههههههههههههههه
لا بجد مشكلة و الا حكاية الضوافر
دا انتى كنتى شقية اخر حاجة
تتصورى انا عمرى ما لعبت فى الشارع
اه و الله
كنت بقف اتفرج على العيال من البلكونة
و اقعد اتحايل على والدتى انى انزل
لكن مين و الله لو كنت انتحرت قدامها عشان انزل
مكانتش بترضى
يالا خيرها فى غيرها
بس كنت بعمل مقالب مع قرايبى و جرانا دايما
موضوع جميل يا توتو سابقا
انتى عسل و الله
سلامى ليكى
عن نفسي كل اصحابي زمان كانوا ولاد ده انا حتى لما كنت في الحضانة كان صديقي الانتيم ولد كان اسمه عبد الهادي..وعبد الهادي ده حضرتك ولد زي القمر احلى مني مية الف مرة بس كان بيحبني جدا وانا والله كنت بحبه بس اعتقد لو شافني دلوقتي هتجيله حالة صرع
هييييييييييييييييه دونيا
كانت ايام...بس انتي كنتي قردة على فكرة شكلك بيقول كدة..خصوصا الصورة بتاعتك دي الي انتي حاطاها..وشكلك كدة والله اعلم لسة قردة بس بتقاومي علشان السن بقى وميصحش وبتاع..صح؟
انتى خايفة تكملى عشان محدش يقول عليكى متشردة
انت كدة التشرد نفسه يا بنتى
ان اكنت طفله اهدى من الهدوء مش زيك كدة عفريتة
وحتى وانا بيبى
لا كنت بعيط ولا ازن
تخيلى امى لسه لحد دلوقتى بتقولى انت السبب انى خلفت تلاته
كنت مفكرة اولادى كلهم هيطلعو زيك
واهى ادبست فى الاخ شهاب مشاكل
وهو عامل زيك بالظبط
وبيشترى ضفادع وسلاحف بردو
____________________________
للى عاوز يزور لوحه شرف يدخل مدونتى وهتلاقو لينك لوحة شرف فيها
لوحة شرف هى لوحه شرف لكل من دون فابدع وينشر بها افضل بوستات كتبها البلوجرية
____________________________
ميفوتكش البوست الجديد (اوزه سينى هدوم اروسه)
عزيزتي نونا
لقد أبهرتني ذكرياتك...ودفعتني دفعا إلى فغر فاهي
فلقد أعدتي صياغة تعريف التشرد من جديد
فقد كان غيرك من الأطفال والكبار يظنون أنهم من المتشردين
ولكنهم كذبوا
خسأ أولئك المدعين ...فلقد إتضح بعد اللي خلتيني أقراها إنه إنهم مالهمش فيها
:)
أيه يابنتي كمية التشرد دي
تحياتي
بصراحة أحيكي على صرحتك المطلقة , بس أنا مش مصدق أنت كنت شقية أوي كدة , أنت كنت واخدة راحتك أوي.
بس حمد اللة بالسلامة
أكتبلك عمر جديد مع كل لحظة شقاوة هههههههههههههه
هههههههههههههه
مدونة فتافيت تشرد
هههههههههههههههههههه
والله من اجمل البوستات اللى قريتها على المدونات
انا هسيفة عندى فى ملف وورد
عشان اقراه كل يوم
جمييييييييل اوى
جيت تانى عشان اضحك
المرة دى جيت ارخم بقى
عموووووووور
ياصباح الدكتره والتشريح
اه قصيت طفولتى فى الاحداث علشان تصدق لمابقولك بدوس على بطن القطه
نوناااااا
::::::::::::
صاحب المضيفه
ياااااااه بجد فكرتك بالايام الخوالى هوا انت كنت شقى ولا ايه بظبط
نورتنى
نوناااا
::::::::
Rainbow
اييييه ده طلعنا بصره يعنى فى لم الضفادع ودود القز انا كمان كنت بحبه وكنت بحب اصطاد دبان واحبسه
شكلى هاشرد لنفسى تانى لا ياستى
شرفتينا بزيارتك ياقمر
نوناااا
مصطفى ريان
ايوه كده بحسب ان حد ممكن يقول عليا متشرده ولا حاجه لا سمح الله انا غلبااااااانه جدااااا
نونااا
:::::
ولاقادم اجمل
والله انا انا عمرى ماتكهربت خاااالص الحمد لله وكمان مكنتش بحب العيال الهاده اه لو كنت قفشتك وانت صغير كنت هاتشوف ايام بمبى معايااا
وبعدين انا لو كملت حواديت هاتفضح استر عليا بقى
نورتنى ياقمر
نوناااا
::::::::
الجعر ابو رمانه
يخراااااااابى ازيك يابنى
وازى الطب معاك ربنا معاكو
لا متخفش منى ده انا نسمه
ده انا مش بخوف خالص خلاص بقى راحت عليا وبقيت هاديه وناديه
وبقيت جبانه اوى كمان
نوناااااا
اهو ده عيبه
نورتينى
التشورود الاطفالى ده بعيد عنك كان من الكبت فاكنت بطلعه تشرد
والله انا بريئه خاااالص ومش بعمل حاجه خالص دلوقتى والله
اكتر من انى اربى قطط وواتجنن واتنطط واغنى بصوت عالى وارغى كتيييير بس
مش بعمل حاجه
شوفتى بقى
نورتينى ياقمر
::::::::::::
هيثم الدهشان
اه طبعا حلو اننا نفتكر طفولتنا بس مصيبه لو انا اتعلمت منها اتعلم ايه يابنى
هو احنا فاضيين نتعلم احنا بنلعب وبس
شرفتنى زيارتك
::::::::::::
فرنسا هانم
نورتى البلوج والله
اه ياستى نفدت من كل ده والحمد لله ربنا سترها معايا ببركه دعا الوالدين
نونااااا
FaceMoon
لالا مافيناش من زعل لو حد عايز يعيش طفولته ياجماعه تانى يجى واحنا نعيشها مع بعض انا فى اتم استعداد
ميرسى على زيارتك اسعدتينى
:::::::::
صوت من مصر
عادى جداااا عارفين انك متشرد
نونااااا
مواطن مصرى نايم
يااهلا يااهلا
نورتنا يارااجل
بجد صعبت عليان انك ملعبتش فى الشارعبجد لعبالشارع جميل مفيد للصحه
انا لو كنت اعرفك كنت اعرف اخليك تزوغ من مامتك ازاى يلا بقى ملكش نصيب تزوغ
بس كويس برضه انك كنت بتطلع الطاقه فى قرايبك لحسن ياعينى كنت طلعتها فينا احنا دلوقتى
ميرسى ياقم على الكومنت
نوناااا
بيسووو
انتى كده صحبتى وحبيبتى وكفاءه
وبتحبى الصبيان زى دول حلوين اوى يابنتى
على فكره ياجدعان البنت اللى انا حطاها اى نعم اموره وعسوله انا حطاها علشان بجد بحس فيها بشاقوتى بس انا والله اموره ياجدعان ومش شبهها
وانا يابيسو اه متشرده وبقاوم بس حد يدينى فرصه
نوناااا
صحفيه روشه
ازيك ياقمر نورتى البلوج
كده ياعنى كده تقولى عليا التشرد نفسه
وانا اللى كنت فكراكى هاترفعى معنوياتى
بس ياااااااخ لو كنت شفتك وانتى صغيره كنت كلتك لا بقى هاكلك لما اشوفك واحنا كبار احنا بيهمنا
نونااااا
محمد محمود يوسف
هههههههههههههه
حلو اوى الكومنت بتاعك
بجد ضحكت عليه اوى عليه
نورتنى ياقمر مستنياك تانى
نونااااا
سيبو فى حاله
اه يابنى اتكبلى عمر جديد بجد
انا ماما على طول تقولى انتى زى القطط بسبع ارواح
حصلتلك كل مصيبه والتانيه وبتطلعى منها بيحسدونى ياشريف شفت
بس انا خلاص بقى بقيت شقيه بس فى البيت كوتيمى يعنى
نوناااااا
احمد
انت تيجى براحتك ياجميل
البلوج بلوجك
وانا مبسوطه والله ان البوست عجبك
يلا اى خدمه ضحكتك اهه اصلا انا بت ثكر وعسل واتحب اصلاااا
نوناااا
ههههههههه انتي عسوبه خالص بس يتخاف منك ومن مقالبك شكلها لسه معاكي لغايه دلوقتي
بس اجمل حاجه لما نعد نفتكر الحاجات دي والذكريات الحلوه دي الايام مش بترجع تاني ويبقى منها الذكريات الحلوه وطفولتنا الجميله الي لايمكن تتعوض ايامها
ياه ايام ماكنا اشقيا قوي ومش بيهمنا حد وبنعمل الي عايزينه براحتنا ايام فعلا
بوست رائع وجميل وفكرني بزمان
خسارة انك مكملتيش باقى الكلام
ذكرياتك كانت عجباني جدا بجد
ياريت اشوف توبيك يبقى الجزء التاني للكلام ده
المدونة بتاعتك ماشاء الله جميلة جدا
الى الامام دائما وربنا يوفقك
سالوا جحا ايه اجمل ايامك قال لما كنت بعبى التراب فى الطقيه
مافيش مرة دخلت المدرسه من بابها وانا فى الابتدائى كنت بمشى اريعه كليو فى الصحرا اللى اخر قريتنا عشان اجيب طين لونه احمر شبه الصلصال
نفسى الايام دى ترجع تانى لانها اجمل
ايام العمر
اول زياره ليا فى مدونتك
اول زياره لى عندك فى مدونتك الاقى كده؟
واضح ان طفولتك كانت هاديه جداااااااااااااااا
وكلها براءه
تحياتى
انتى فين يا نونا
مختفية ليه
وقعتى فى علبة زبادى ولا ايه
هههههههههههههههه
حاسوبتيه
ازيييييك
اه يابنتى انا شقيه نوعا ما بس مايتخفش منى والله
دنا غلباااااااان
ميرسى على الكومنت الحلو
نوناااا
TheRiddle
ميرسى ربنا يخليك على كلامك
وانا مبسوطه ان ذكرياتى عجبتك وهابقى اعمل توبك تانى على الحكاوى دى لها ان شاء الله
شرفتنى بزيارتك
نونااااا
ELHAWARY
نورتنى فى اول زياره ليك
وبجد عندك حق ايام الطفوله دى بجد متتعوضش ابدااااااا
احلى حاجه اصلا
نوناااا
بحبك يامصر
نورتنى فى اول زياره ليك
واه طبعا اكنت طفولتى فى منتهى الهدوء والرقه وبراءه الاطفال كانت فى عينى
ميرسى على الكومنت
نونااااا
احمد
انا موجوده اهه
ومش مختفيه ولا حاجه
كنت باكل جزر منا خلاص طلعلى سنان
نونااا
انتى كانت طفولتك شقيه اوى يافتفت
ملحوظه
انا مكنتش بحب الزبادى لووووووول
ايه العسل ده و لا مذكرات سعد زغلول يا بنتي و صلت انك وقعت في بلاعة يا جامدة
حمد لله علي سلامتك و ابقي دايما اتحفينا و التدوينات اللذيذة دي
انا مزهول بصراحة أنت عرفتي منين أني أسمي شريف
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
ههههههههههههههههههههه
أزاي مش فاهم
اجدع بنوته
ازييييييييك
زاى يعنى مكنتيش بتحبى الزبادى ده انا مدمناه
نورتينى ياقمر
:::::::::::
ام احمد المصريه
الله يسلمك يارب دايما
اه شفتى ازاى انا وقعت فى بلاعه ومش بلاعه صغيره ياريت دى اكبر بلاعه موجوده
يلا بقى كله خير
شرفتينى بزيارتك
::::::::::
ايه ياشريف مش هاقولك انا عرفت اسمك منين وخليك كده مذهول
يابنى انا شيخه ومكشوف عنى الحجاب
نوناااااا
ههههههههههههههههههههههههه
اقولهم بقي انك لسة متشردة لحد دلوقتي
والشقاوة بتنط من عينك
عسلللللللل
تخيلتك وانت بيبي كدا ومش باينة من الارض
ورايحة للاسد
ياه التشرد
اننا بردة ليا مغمارات بالهبل
بس موصلتش لدرجة البلاعة
هههههههههههه
سلامممممممممممممم
اسد مره واحده يا توتو لالالا انت كنت مشكله فعلا الحمد لله ان ربنا نجاكى
وتقصى ضوافر بنت خلتك ليه يا شقيه
عموما الشخصيه الشقيه بتبقى مرحه ودمها زى العسل
تحياتى يا بنوته شقيه ولاء
أوك خليني كدة مذهول , أنت عفريتة أوي يا نهى
هههههههههههههههههههههههههه
مذهولة؟
الدور عليكي
ههههههههههههههههههههه
ياه يا صباح التشرد صحيح فكرتينى بايام زمان واللعب فى الشارع بس مكنتش بعمل مقالب مره اتعمل فيه مقلب من اخويا رئيس جمهوريه نفسى وقالى تعالى اعمل ليكى كوافير وقص شعرى وعانيت سنين على مرجع لحالته يعنى انا كنت هاديه جدا
السلام عليكم اول زيارة ومكنتش ابدا احب ادخل على مراحل تشردك الاولى كدا على طول
ههههههههههههه
فكرتينى بزماااااااااان
تحياتى
ايه ده ايه ده
ده انتي كنتي
دماغ عاليه قوي
بس زي العسل
بس انا بأيد الي سموكي
سووووووووووووسا
هو ده انسب اسم
ههههههههههههه
بس بالنسبه لاسم البوست
انا عمري محبيت الزبادي
ولا حتي رحته
عاااااااااااااااااااعااا
كنت باكل سيريلاك
يلا بقي(بست وشز فور يو)0
my hope
منمن حبيبى ازيك
انا برضه شقيه لحد دلوقتى دنا غلبانه خاااالص
انا بس لما حد بيدايقنى بجننه بس
نورتينى ياقمرايه
:::::::::::::
walaa
شفتى بقى ياولاء اسد مره واحده مش كلب مثلا لا اسد
اصل انا مش بحباللعب مع الحجات الاليفه
واه اقص ضوافر بنت خالتى ليه هيا ضوافيرها طويله وتغظنى هيا اللى جنت على نفسها
شرفتينى بزيارتك
::::::::::::
اه خليك مذهول كده برضه مش هاقولك
وانا عارفه انت عرفت اسمى منين هههههههه
يابنى انا شيخه ومكشوف عنى الحجاب وكمان شريره
يلا يامذهول
نوناااااا
اميره الصعيد
شرفتينى بزيارتك بجد ونورتى البلوج
عارف انا كنت زى اخوكى كده بستلم العيال لطيبه واطلع عليهم مواهبى كلهم
يلا ربنا يخليكو لبعض
::::::::::
la3lahakhier
نورت البلوج
بس ليه يعنى مكنتش تحب تقرا مش تتعرف على صاحب البلوج الاول وهو صغير علشان تعرف انت بتتعامل مع مين
يلا واى خدمه فكرتك بزمااااان
:::::::::::::
نورى
ازيك شرفتينى بزيارتك ياقمر
يابنتى صدقينى مافيش احسن من الدمااااااااغ العااااليه بجد عالم تانى خاااالص
وعلى فكره انا كنت بحب الزبادى جداااا
ماشى
نونااااا
ايه العيشة الغم ده ؟
بجد بوست جميل قوي ودمه خفيف
ذكريات ..
ايام التفولة وبتاع .. انا بقه فاكر اني وانا في سنه تانيه ابتدائي كنت لسه عبيط .. خدت 300 ريال من جيب الوالد الله يرحمه ورحت المدرسة عزمتها كلها على بيبسي وسانتوب وساندوشتات في الفسحة
ده كانت العلقة الوحيدة
احم
كوارث
ههههههههههههه تعزم المدرسه كلها طيب راجل مش كنت تقوى ياخرابى علييييك
وليه تاخد علقه يعنى انت كدخ ولد كريم وبتحب الناس عادى يعنى
اه صحيح
ليه يعنى العيشه غم؟؟؟
ومين ده الى يقدر عليكى متشرده ده برضه كلام هو كل ما فى الامر انه انطلاق مش اكتر او ااقل
شركة المثالية للتنظيف
شركة المثالية للتنظيف بالدمام
شركة المثالية للتنظيف بالخبر
شركة المثالية للتنظيف بالجبيل
شركة المثالية للتنظيف بالقطيف
شركة المثالية للتنظيف بالاحساء
شركة مكافحة حشرات بالجبيل
شركة رش مبيدات بالجبيل
شركة تسليك مجاري بالجبيل
شركة كشف تسربات المياه بالجبيل
Post a Comment